Афғонистоннинг ғарбидаги Ҳирот шаҳрида Толибон ҳукумати томонидан аёлларни исломий кийиниш қоидаларига амал қилмаганликда айблаб ҳибсга олиниши ортидан норозилик намойиши бўлиб ўтди. Намойишни тарқатиш учун хавфсизлик кучлари томонидан ўқ отилган. Бу ҳақда халқаро оммавий ахборот воситалари хабар бермоқда.
Маълум қилинишича, сўнгги кунларда Ҳиротда камида ўнлаб аёллар ҳижоб талабларини бузганликда гумон қилиниб ушланган. Ушбу ҳолат маҳаллий аҳоли орасида кескин норозиликка сабаб бўлган ва юзлаб фуқаролар кўчаларга чиқиб, аёлларга нисбатан босимларни тўхтатишни талаб қилган.
Гувоҳларнинг айтишича, намойиш давомида Толибон хавфсизлик кучлари йиғилганларни тарқатишга уринган ва ҳавога ҳамда намойишчилар томон ўқ узган. Турли манбаларга кўра, ҳодиса оқибатида ҳалок бўлганлар ва жароҳатланганлар бор. Айрим хабарларда қурбонлар орасида бола ҳам бўлгани айтилмоқда.
БМТнинг Хотин-қизлар масалалари бўйича агентлиги маълумотига кўра, аёлларнинг ҳибсга олиниши мамлакатдаги хотин-қизлар орасида қўрқув ва хавотирни янада кучайтирган. Ташкилот намойишчиларга қарши куч ишлатилганини қоралаб, воқеа юзасидан холис суриштирув ўтказишга чақирган.
Толибон расмийлари эса аёлларни ҳибсга олиш ҳақидаги хабарларни рад этиб, тарқалаётган маълумотларни асоссиз деб атаган. Шу билан бирга, ҳаракат вакиллари мамлакатда ҳижоб қоидаларига риоя этилиши шартлигини таъкидламоқда.
Эслатиб ўтамиз, 2021 йилда ҳокимиятни қайта эгаллаган Толибон шундан буён Афғонистонда аёллар ҳуқуқларига оид қатор чекловларни жорий этган. Хусусан, қизларнинг ўрта ва олий таълим олиши, кўплаб соҳаларда меҳнат қилиши ҳамда жамоат ҳаётидаги иштироки кескин чекланган.
