Сурхондарё вилоятининг Жарқўрғон туманида дарёга чўмилиш учун борган бир гуруҳ ёшлар билан боғлиқ фожиали ҳодиса юз берди. Бу ҳақда UzNews хабар бермоқда.
Маълум қилинишича, Намуна маҳалласи ҳудудидан оқиб ўтувчи Сурхондарё дарёсига 2008 йилда туғилган 6 нафар йигит борган. Улардан беш нафари чўмилиш мақсадида сувга тушган бўлса, бир нафари соҳилда қолган.
Хабарга кўра, дарёнинг кучли оқими туфайли сувга тушган йигитлар оқим таъсирида қолган. Ҳодиса вақтида атрофда бўлган фуқаролар зудлик билан ёрдам кўрсатиб, икки нафар йигитни қутқариб қолишга муваффақ бўлган.
Бироқ яна уч нафар йигитни сув оқими олиб кетган. Воқеа жойига фавқулодда вазиятлар хизмати қутқарувчилари ва ғаввослар жалб қилинган.
UzNews маълумотига кўра, қидирув-қутқарув ишлари давомида дастлаб бир нафар йигитнинг жасади топилган. Кейинчалик яна бир нафари аниқланган. Ҳозирда учинчи йигитнинг жасадини қидириш ишлари давом этмоқда.
