АҚШ Украинадаги уруш ва Эрон атрофидаги геосиёсий кескинликлар фонида дунёдаги энг йирик нефть экспортчисига айланди. Бу ҳақда Reuters агентлиги хабар берди.
Қайд этилишича, мазкур ўзгариш ўнлаб йиллар давомида жаҳон нефть бозорида етакчилик қилиб келган Саудия Арабистони ва Россиянинг устун мавқеига таъсир кўрсатган.
Маълумотларга кўра, Вашингтон ва Теҳрон ўртасидаги қуролли можаро ҳамда Россия нефть экспортига қарши қўлланилаётган санкциялар глобал энергия савдосини қайта шакллантирмоқда. Бу эса Америка энергетика компанияларининг халқаро бозордаги ўрнини янада мустаҳкамлаган.
Reuters келтирган маълумотларга кўра, май ойида АҚШнинг хом нефть ва нефть маҳсулотлари экспорти кунига қарийб 10,5 миллион баррелни ташкил этган. Шу тариқа мамлакат кетма-кет учинчи ой жаҳонда энг кўп нефть экспорт қилувчи давлат бўлиб турибди.
Таққослаш учун, май ойида Россиянинг нефть экспорти кунига 7 миллион баррел, Саудия Арабистониники эса 5,9 миллион баррел атрофида бўлган.
Таҳлилчиларнинг фикрича, АҚШнинг бу даражага чиқишига 2010 йиллардан бошлаб сланец нефти ва газини қазиб олиш ҳажмининг кескин ошиши асосий омил бўлган. Натижада мамлакат аввал газ, кейин эса нефть ишлаб чиқариш бўйича жаҳон етакчисига айланган.
Kpler таҳлилий компанияси вакили Мишель Брюарнинг таъкидлашича, АҚШ ташқи сиёсати учун энергетика экспорти янги таъсир воситасига айланган.
Экспертлар фикрича, АҚШнинг янги мақоми мамлакатга халқаро музокараларда қўшимча устунлик бериши мумкин. Шунингдек, бу ҳолат OPEC ва унинг ҳамкорлари бўлган давлатларнинг жаҳон нефть бозоридаги таъсирини қисман заифлаштириши эҳтимол қилинмоқда.
Маълумот учун, АҚШ 2015 йилда қирқ йил давом этган нефть экспорт қилиш тақиқини бекор қилган эди. Орадан ўн йил ўтиб, мамлакат дунёдаги энг йирик нефть экспортчиси мақомини қўлга киритди.
