"Uzbekistan Airways" авиакомпанияси Россия йўналишидаги айрим авиақатновлар сони қисқартирилишини маълум қилди. Компания бу қарорни авиация ёқилғиси тақчиллиги ҳамда унинг нархи ошиб бораётгани билан изоҳлаган.
Авиаташувчи маълумотига кўра, ўзгаришлар Ўзбекистон шаҳарларидан Россияга амалга ошириладиган айрим рейсларга тааллуқли бўлади. Шу билан бирга, Москва, Санкт-Петербург, Қозон, Екатеринбург, Красноярск, Новосибирск ва Хабаровск шаҳарларига парвозлар давом эттирилади.
Қайд этилишича, бекор қилинган рейслар йўловчиларига икки хил имконият таклиф этилади. Улар қўшимча тўловсиз кейинги мавжуд рейсларга қайта брон қилиш ёки авиачипта учун тўланган маблағни тўлиқ қайтариб олиш ҳуқуқига эга бўлади.
Компания чипта маблағлари улар харид қилинган жой орқали қайтарилишини билдирган. Агар авиачипта Uzbekistan Airways’нинг расмий сайти ёки мобил иловаси орқали сотиб олинган бўлса, йўловчилар махсус электрон почта манзили орқали мурожаат қилиши мумкин.
Шунингдек, авиакомпания йўловчиларга парвозлар жадвалидаги ўзгаришларни расмий сайт ва мобил иловада мунтазам кузатиб боришни тавсия қилди.
Маълумот учун, Россия жорий йил июнь ойидан бошлаб авиация керосини экспортига вақтинчалик тақиқ жорий қилган. Реактив двигателлар учун мўлжалланган ёқилғини, жумладан биржа савдолари орқали харид қилинган маҳсулотларни мамлакатдан олиб чиқишга қўйилган чеклов 2026 йил 30 ноябргача амал қилади.
Аввалроқ Ўзбекистон Энергетика вазирлиги Россия томонидан авиаёқилғи экспортига киритилган тақиқ Ўзбекистонга етказиб бериш жараёнларига таъсир қилмаслигини маълум қилган эди. Вазирликка кўра, икки давлат ўртасида тегишли ҳукуматлараро битим амал қилиб келмоқда.
