Ижтимоий тармоқларда Turkish Airlines авиакомпаниясига тегишли Boeing 777 самолётининг Анталия аэропортида радар мачтасига урилиши оқибатларини акс эттирувчи видеолар тарқалди. Бу ҳақда Rasdaily хабар берди.
Кадрларда зарба шу қадар кучли бўлгани, мачта парчалари самолёт фюзеляжи устига қулаб тушгани акс этган. Ҳодисадан қўрқиб кетган айрим йўловчиларга борт кузатувчилари ёрдам кўрсатган.
Тарқалган видеоларга кўра, зарба самолётнинг ўнг қаноти қисмига тўғри келган. Тўқнашув оқибатида ҳаво кемаси сезиларли даражада шикастланган.
Ҳодиса Истанбул — Анталия йўналишидаги рейс қўнганидан кейин содир бўлган. Дастлабки маълумотларга кўра, самолёт тўхташ жойига ҳаракатланаётган вақтда нотўғри йўлакка кириб қолган ва ўнг қаноти билан ер усти радари мачтасига тегиб кетган.
Мазкур маълумотни Turkish Airlines авиакомпаниясининг жамоатчилик билан алоқалар бўйича директори Яҳё Устюн ҳам тасдиқлаган.
Самолёт бортида 267 нафар йўловчи бўлган. Уларнинг барчаси эвакуация қилинган. Ҳодиса оқибатида бир киши енгил тан жароҳати олган.
Авиакомпания маълум қилишича, воқеа юзасидан техник текширув бошланган.
