Нью-Йорк Никс баскетбол жамоаси NBA финалида ярим асрдан ортиқ вақтдан сўнг илк бор чемпионликни қўлга киритганидан кейин Нью-Йорк Сити кўчаларида оммавий байрамлар тартибсизликларга айланиб кетди. Бу ҳақда BBC хабар берди.
"Никс" клуби ҳал қилувчи баҳсда Сан-Антонио Спёрсни 94:90 ҳисобида мағлуб этиб, чемпионликни расмийлаштирди. Ғалаба муносабати билан минглаб мухлислар шаҳар марказига йиғилди.
Бироқ байрам кечаси давомида бир қатор нохуш воқеалар содир бўлди. Times Square яқинида отишма юз бериб, 17 ёшли ўсмир оёғидан яраланди. Шунингдек, бир нечта мактаб автобусларига ўт қўйилди, айрим транспорт воситалари ва полиция машиналарига зарар етказилди.
Полиция маълумотига кўра, байрам вақтида муштлашувлар, пичоқбозлик ҳолатлари ва пиротехника воситаларидан фойдаланиш ҳолатлари ҳам қайд этилган. Тартибсизликлар муносабати билан 63 киши қўлга олинган.
Аввалроқ баскетбол клуб эгаси Жеймс Долан мухлисларни эҳтиёткор бўлишга чақирган ва байрам давомида ҳеч кимга зарар етказмасликни сўраган эди.
