Эрон АҚШ билан биргаликда тайёрланаётган қўшма меморандумни 14 июнь — якшанба куни имзолашдан бош тортди. АҚШ президенти Дональд Трамп билдирган эҳтимолий келишув режаларига жавобан Эрон ТИВ вакиллари изоҳ берди. Бу ҳақда DW берган хабарига таяниб Zamon.uz маълум қилди.
Эрон Ташқи ишлар вазирлиги матбуот котиби Исмоил Бағоига кўра, меморандумни имзолаш санаси бўйича аниқ қарор мавжуд эмас.
“Ҳозирча аниқ сана ҳақида гапиришга эрта. Эртага имзоланиши кутилмаяпти, аммо яқин кунларда келишувга эришиш эҳтимоли истисно қилинмайди. Шу билан бирга, қарши томон вазиятидаги беқарорликни инобатга олган ҳолда, бу жараён ҳақида эҳтиёткорлик билан баёнот бериш лозим”, — деди у.
Бағонинг таъкидлашича, ҳужжат асосан ҳарбий ҳаракатларга чек қўйишга қаратилган бўлиб, бу босқичда Эроннинг ядровий дастури масаласи муҳокама қилинмайди.
Шу билан бирга, Эрон инқилобий қўриқчилар корпусига яқин бўлган Форс агентлиги маълумотига кўра, Эрон томони АҚШнинг “оммавий ва маросимий сиёсий шоу”ларга айлантиришга қаратилган ташаббусларига рози бўлмаслиги мумкин.
Музокараларга яқин манба эса ҳали якуний қарор қабул қилинмаганини, ҳукумат томонидан сиёсий, ҳуқуқий ва техник жиҳатлар ўрганилаётганини маълум қилди.
АҚШ президенти Дональд Трамп аввалроқ Эрон объектларига зарбалар бекор қилинганини билдириб, Теҳрон билан келишув яқин кунларда имзоланиши мумкинлигини айтган эди.
