Бангладеш соғлиқни сақлаш вазирлиги маълумотларига кўра, охирги уч ҳафта ичида камида 98 нафар бола қизамиқ касаллиги оқибатида вафот этган. Бу ҳақда Zamon.uz хабар берди.
Бангладеш Соғлиқни сақлаш вазирлиги 6 ойдан 5 ёшгача бўлган болалар орасида қизамиқ белгилари қайд этилганлар сони 6,476 нафарга етганини маълум қилган. Юқумли касалликларни назорат қилиш бўйича директор Ҳалимур Рашиднинг айтишича, бу кўрсаткич аввалги йилларга нисбатан анча юқори.
ЖССТ маълумотларига кўра, мамлакатда энг катта қизамиқ эпидемияси 2005 йилда қайд этилган бўлиб, унда 25,934 та ҳолат қайд қилинган. Кейинги йилларда бу кўрсаткич сезиларли даражада камайган, аммо жорий йилда яна ошган. Рашид эпидемияни “вакцина етишмовчилиги ва бошқа омиллар” билан изоҳлаган.
Олти ойдан беш ёшгача бўлган болалар орасида тасдиқланган 826 тa қизамиқ ҳолати бўлиб, уларнинг 16 нафари вафот этган. Кўплаб ҳолларда қизамиққа тест ўтказилмаган ёки бемор таҳлил натижалари чиқмасдан вафот этган.
Қайд этилишича, Бангладеш юқумли касалликлар билан курашишда эмлаш бўйича ютуқларга эришган, аммо 2024 йил июнь ойидаги қизамиққа қарши эмлаш кампанияси ўша йилги исён туфайли кечикган.
Шунингдек, Қизамиқ ва қизилчани текшириш миллий қўмитаси раҳбари Маҳмудур Раҳмон эмлаш дастурларининг етарли бўлмагани сабабли 2025 йил декабрга қадар касалланганлар сонини нолга тушириш мақсадига эриша олмаганликларини тан олди.
Пойтахт Дакка энг кўп зарарланган 30 та ҳудудни аниқлаб, эмлаш кампаниясини бошлади. Соғлиқни сақлаш вазири дастур аввал энг оғир ҳудудларни қамраб олишини, кейинчалик эса бошқа ҳудудларга кенгайтирилишини маълум қилди.
Собиқ расмий ва жамоат соғлиғи эксперти Тажул Ислом А Бари, маблағ ажратилган бўлса-да, вакциналарни харид қилиш амалга оширилмаганини айтиб, вазиятни “даҳшатли” деб баҳолади.
