Тошкентдаги Ҳасанбой даҳасида Isuzu автобуси иштирокида аянчли йўл-транспорт ҳодисаси содир бўлди. Бу ҳақда Facebook`даги “Водители Ташкента” гуруҳи аъзолари хабар бермоқда.
Изоҳлардан маълум бўлишича, авария 23 декабрь, жума куни юз берган. Сирпанчиқ йўлда мувозанатни йўқотган автобус йўл устида жойлашган хонадонлардан бирига бориб урилган.
Хабарга илова қилинган видеода тўқнашув оқибатида автобуснинг олд қисми жиддий зарар кўргани акс этган.
Бахтли тасодиф туфайли ЙТҲ оқибатида ҳеч ким зарар кўрмаган, жароҳатланганлар ҳам йўқ.
Маълум бўлишича, автоҳалокат иштирокчиси бўлган Isuzu 3-автобус саройига тегишли бўлган ҳамда 42-йўналиш бўйича ҳаракатланган.
