Тошкент халқаро инвестиция форуми йил сайин ўз нуфузини мустаҳкамлаб бормоқда. Бу йилги анжуман иштирокчилар сони ва халқаро қамрови бўйича янги рекорд ўрнатди. Форумда жами 10 минг 600 нафардан ортиқ иштирокчи қатнашган бўлиб, уларнинг 4 мингдан зиёди дунёнинг 102 давлатидан ташриф буюрган хорижий меҳмонлар ва инвесторлардир.
Анжуман юқори даражадаги сиёсий ва иқтисодий вакиллик билан ҳам ажралиб турди. Хусусан, Германия Федератив Республикаси Президенти Франк-Вальтер Штайнмайер ҳамда Албания Республикаси Президенти Байрам Бегай форум меҳмонлари қаторида бўлди.
Шунингдек, Россия Ҳукумати Раиси Михаил Мишустин, Беларусь Бош вазири Александр Турчин, Озарбайжон Бош вазири Али Асадов, Қозоғистон Бош вазири Олжас Бектенов, Қирғизистон Вазирлар Маҳкамаси Раиси – Президент Администрацияси раҳбари Адилбек Қосималиев ва Тожикистон Бош вазири Қоҳир Расулзода каби юқори мартабали расмийлар ҳам форумда иштирок этди.
Тадбирда халқаро молия институтлари раҳбарлари ва вакиллари ҳам кенг қатнашди. Улар орасида Европа тикланиш ва тараққиёт банки, Жаҳон банки, Осиё тараққиёт банки, Осиё инфратузилма инвестициялари банки, Европа инвестиция банки, Халқаро молия корпорацияси ҳамда бошқа йирик молиявий ташкилотлар бор.
Форумнинг эътиборга молик жиҳатларидан бири шундаки, иштирокчилар Тошкентга қандайдир имтиёз ёки рағбатлантирувчи механизмлар асосида эмас, балки ўз маблағлари ҳисобидан ташриф буюрган. Хорижий меҳмонлар ва инвесторлар транспорт, меҳмонхона ҳамда бошқа харажатларни мустақил равишда қоплаган.
Бу ҳолат Ўзбекистон иқтисодиётига бўлган халқаро ишонч, мамлакатдаги барқарорлик ва инвестиция муҳитининг жозибадорлигига берилган амалий баҳо сифатида кўрилмоқда.
Экспертлар фикрича, Европа, Болқон, Марказий Осиё ва Кавказ давлатлари раҳбарлари ҳамда халқаро молия институтларининг бир майдонда жамланиши Ўзбекистоннинг минтақавий иқтисодий ҳамкорликдаги ўрни тобора кучайиб бораётганини кўрсатади.
Тошкент халқаро инвестиция форуми нафақат сармоя жалб қилиш майдони, балки йирик иқтисодий ташаббуслар муҳокама қилинадиган муҳим платформалардан бири сифатида шаклланиб улгурди. Форум натижалари Ўзбекистоннинг халқаро иқтисодий макондаги мавқеи тобора мустаҳкамланаётганини яна бир бор намоён қилди.
