Бугун, 17 июнь куни Кўксарой қароргоҳида Ўзбекистон Республикаси Президенти Шавкат Мирзиёев ва Германия Федерал Президенти Франк-Вальтер Штайнмайер ўртасида музокаралар бўлиб ўтди. Учрашув тор доирада ҳамда расмий делегациялар иштирокида давом этди.
Музокараларда икки мамлакат ўртасидаги сиёсий мулоқотни мустаҳкамлаш, савдо-иқтисодий алоқаларни кенгайтириш, инвестициявий ҳамкорликни ривожлантириш ва маданий-гуманитар муносабатларни чуқурлаштириш масалалари муҳокама қилинди.
Давлат раҳбарлари кейинги йилларда Ўзбекистон ва Германия ўртасидаги муносабатлар юқори даражага кўтарилганини қайд этди. Хусусан, ўтган йил якунларига кўра, ўзаро товар айирбошлаш ҳажми 1,4 миллиард доллардан ошган. Жорий йилнинг ўтган қисмида эса бу кўрсаткич яна 5 фоизга ўсган.
Шунингдек, Германиянинг Ўзбекистон иқтисодиётига киритган инвестициялари ҳажми 2025 йилда 2 миллиард долларга етгани таъкидланди.
Учрашувда май ойида Тошкентда ўтказилган Германия иқтисодиёти кунлари ҳамда Германия – Ўзбекистон ишбилармонлар кенгашининг 10-йиғилиши натижалари юқори баҳоланди. Ушбу тадбирлар доирасида 1 миллиард долларлик янги инвестиция ва савдо келишувлари имзоланган.
Томонлар саноат, энергетика, “яшил иқтисодиёт”, транспорт ва логистика, тоғ-кон саноати, тўқимачилик, фармацевтика, қишлоқ хўжалиги, таълим ҳамда соғлиқни сақлаш соҳаларида ҳамкорликни янада кенгайтиришдан манфаатдор эканини билдирган.
Музокараларда таълим соҳасидаги ҳамкорликка ҳам алоҳида эътибор қаратилди. Қайд этилишича, бугунги кунда Ўзбекистонда 400 мингдан ортиқ ёшлар немис тилини ўрганмоқда, 2 мингдан зиёд талаба Германия олий таълим муассасаларида таҳсил олмоқда.
Шунингдек, давлат раҳбарлари минтақавий ва халқаро кун тартибидаги долзарб масалалар юзасидан фикр алмашди ҳамда “Марказий Осиё – Германия” форматидаги ҳамкорлик истиқболларини муҳокама қилди.
Томонлар Германия Президентининг мазкур ташрифи Ўзбекистон–Германия муносабатларини янада мустаҳкамлаш ва кўп қиррали шерикликни янги босқичга олиб чиқишга хизмат қилишига ишонч билдирди.
