Қозоғистоннинг Оқтобе вилояти 19 июнь куни ёқилғи қуйиш шахобчаларидан бирида содир бўлган фожиали ёнғин оқибатида аёл ва икки норасида бола ҳалок бўлди. Бу ҳақда ZTB NEWS хабар қилди.
Маълум қилинишича, воқеа Бокенбай Батыра ва Макатаев кўчалари кесишмасида жойлашган АГЗСда юз берган. Honda автомобили заправка ҳудудида тўсатдан ёнган.
Ёнғин ўчирилгандан сўнг автомобиль салонида уч нафар шахс — аёл ва икки норасида боланинг жасадлари топилган. Яна бир киши жароҳатланиб, шифохонага етказилган.
Оқтобе вилояти полиция департаменти томонидан портловчи объектларда хавфсизлик қоидаларини бузиш моддаси бўйича жиноят иши қўзғатилган.
Идора маълумотига кўра, АГЗС эгаси ушланиб, вақтинча сақлаш ҳибсхонасига жойлаштирилган.
Ҳодиса бўйича тергов ишлари давом этмоқда.
