Ўзбекистонда 100 млн сўмдан ортиқ солиқ қарзига эга қурилиш корхоналари сони қарийб 2 мингтага етди.
2026 йил 1 июнь ҳолатига кўра, солиқ қарзи 100 млн сўмдан юқори бўлган қурилиш корхоналари сони 1 964 тани ташкил этди. Уларнинг жами солиқ қарзи 2,56 трлн сўмга етган.
Солиқ қўмитаси маълумотига кўра, умумий қарздорликнинг 618,6 млрд сўми ёки 24,1 фоизи энг катта солиқ қарзига эга 10 та қурилиш корхонаси ҳиссасига тўғри келади.
Ҳудудлар кесимида энг юқори қарздорлик Тошкент шаҳрида қайд этилган. Пойтахтдаги қурилиш компанияларининг жами солиқ қарзи 817,4 млрд сўмни ташкил этган. Кейинги ўринларда Андижон вилояти (329,1 млрд сўм) ва Тошкент вилояти (304,5 млрд сўм) жойлашган.
Энг катта солиқ қарзига эга қурилиш корхоналари қаторига "Aziya Invest Favorit", "Оқбулоқ Обод Гузари", "Tamirlash Qurish Servis", "Agro Asia Trade Service", "Grand Road Tashkent", "Usta Obid Brend", "Oltin Baliq", "National Road Invest" ва "DSK Binokor" кирган.
