Хоразм вилоятининг Ҳазорасп туманида Жанубий Кореяга ишга юборишни ваъда қилиб, фуқароларнинг йирик миқдордаги пулларини фирибгарлик йўли билан ўзлаштирган шахслар фош этилди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Қайд этилишича, Департаментнинг Ҳазорасп тумани бўлими томонидан ўтказилган терговга қадар текширув давомида фуқаро Д.М. ва бошқалар олдиндан тил бириктириб, фуқаролар Б.Й. ҳамда Ш.Ў.ни Миграция агентлигида ишловчи танишлари орқали Жанубий Кореяга ишга жўнатишни ваъда қилган. Улар шу тариқа жабрланувчилардан 15 минг 500 АҚШ долларини фирибгарлик йўли билан олган. Тергов давомида мазкур маблағнинг 1 минг 500 АҚШ доллари процессуал тартибда қайтарилган.
Текширувлар чоғида ушбу шахслар яна 17 нафар фуқарони Жанубий Кореяга ишга кетиш учун топшириладиган имтиҳондан ўтказиб беришни ваъда қилиб, улардан жами 159 минг 500 АҚШ долларини фирибгарлик йўли билан қўлга киритгани ҳам аниқланган.
Шунингдек, яна бир ҳолатда фуқаро Х.Х. К.А.га Жанубий Кореяга ишга кетиш учун топшириладиган имтиҳонни ижобий ҳал қилиб беришни ваъда қилиб, ундан 10 минг АҚШ долларини олгани маълум бўлган. Мазкур маблағ ҳам процессуал тартибда тўлиқ қайтарилган.
