Ўзбекистон Республикаси Президенти Шавкат Мирзиёев бугун, 6 июль куни Қозоғистоннинг Биринчи Президенти Нурсултон Назарбоев билан телефон орқали мулоқот қилиб, уни таваллуд куни муносабати билан самимий табриклади. Бу ҳақда Президент матбуот хизмати хабар қилди.
Маълум қилинишича, давлат раҳбари Нурсултон Назарбоевга мустаҳкам соғлиқ, бахт-саодат ва узоқ умр тилаган.
Шунингдек, Президент Назарбоевнинг замонавий Қозоғистон давлатчилигини шакллантириш, Марказий Осиёда минтақавий ҳамкорликни ривожлантириш ҳамда Ўзбекистон ва Қозоғистон ўртасидаги стратегик шериклик ва иттифоқчилик муносабатларини мустаҳкамлашга қўшган ҳиссасини алоҳида эътироф этган.
Суҳбат давомида икки мамлакат ўртасидаги дўстлик, яхши қўшничилик ва ўзаро ишончга асосланган кўп қиррали ҳамкорлик бугунги кунда изчил ривожланаётгани мамнуният билан қайд этилган.
