Маълум бўлишича, воқеа 2025 йил 3 ноябрь куни Ўзбекистон туманида содир бўлган. Спиртли ичимлик таъсирида бўлган эркак қайнотасининг уйига келиб, турмуш ўртоғи билан учрашган. Аёл ундан аввал алимент ундириш масаласида судга мурожаат қилган бўлиб, суд қарорига кўра эркак 15 суткага қамалган.
Жазо муддатини ўтаб чиққанидан сўнг, эр-хотин ўртасидаги низо янада кескинлашган. Тергов маълумотларига кўра, эркак алимент тўлашдан қутулишни мақсад қилиб, олдиндан ўзи билан олиб келган ошхона пичоғи орқали аёлига бир неча бор тан жароҳати етказган. Шундан сўнг у 2023 йилда туғилган 3 ёшли қизига ҳам пичоқ билан зарба берган.
Оқибатда, қизалоқ воқеа жойида ҳалок бўлган. Оғир тан жароҳати олган аёл эса шифохонага олиб кетилаётган вақтда вафот этган. Жиноятдан сўнг эркак воқеа жойидан қочиб кетган.
Жиноят ишлари бўйича Ўзбекистон тумани суди уни Жиноят кодексининг 97-моддаси 2-қисми “а”, “в”, “ж”, “и” бандлари билан айбдор деб топиб, 19 йил муддатга озодликдан маҳрум қилиш жазосини тайинлади.
