Канадалик машҳур хонанда Жастин Бибер 2026 йилги футбол бўйича Жаҳон чемпионати финал учрашувининг танаффусида саҳнага чиқади. Бу ҳақда Халқаро футбол федерацияси (FIFA) матбуот хизмати маълум қилди.
Маълум қилинишича, Бибер финал танаффусида ташкил этиладиган мусиқий шоу дастурида иштирок этадиган санъаткорлар рўйхатига қўшилган. Аввалроқ ушбу концертда америкалик хонанда Мадонна, колумбиялик ижрочи Шакира ҳамда Жанубий Кореянинг BTS поп гуруҳи ҳам иштирок этиши маълум қилинган эди.
2026 йилги Жаҳон чемпионати АҚШ, Канада ва Мексика мезбонлигида ўтказилмоқда. Мусобақа 19 июль куни якунланади. Финал баҳси АҚШнинг Нью-Жерси штатидаги Ист-Ратерфорд шаҳрида жойлашган "МетЛайф" стадионида бўлиб ўтади.
Айни пайтда турнир чорак финал босқичига етиб келган. Жаҳон чемпионлиги учун Франция, Марокаш, Испания, Бельгия, Норвегия, Англия, Аргентина ва Швейцария миллий терма жамоалари курашни давом эттирмоқда.
