Ўзбекистон профессионал футбол лигасининг 2026 йилги регламентига мувофиқ, Суперлига мавсуми 4 май кунидан танаффусга чиққан.
Маълум қилинишича, 6 майдан бошлаб миллий терма жамоа маҳаллий футболчилар иштирокида йиғинини бошлайди. Ушбу йиғин доирасида 10, 17 ва 24 май кунлари Суперлиганинг етакчи клубларига қарши назорат учрашувлари ўтказилиши режалаштирилган.
Шунингдек, май, июнь ва июль ойларида юзага келган танаффус сабаб, май ойининг қолган қисмида Ўзбекистон кубоги учрашувлари ўтказилиши белгиланган.
Суперлиганинг иккинчи қисми Жаҳон чемпионатидан кейин — 20 июль куни старт олади. Мавсумнинг сўнгги тури эса 3 декабрь санасига белгиланган. Ўтиш ўйинлари ҳамда кубокнинг ярим финалида иштирок этмайдиган жамоалар шу санадан сўнг танаффусга чиқади.
Қайд этилишича, ўтиш ўйинлари қисқа муддатда ташкил этилиши учун улар марказлаштирилган тарзда Тошкент шаҳрида ўтказилади.
Айни вақтда турнир жадвалида Фарғонанинг "Нефтчи" жамоаси 28 очко билан пешқадамлик қилмоқда. Ундан кейин 26 очко билан Тошкентнинг "Пахтакор" жамоаси бормоқда. Кучли учликни эса 20 очко билан «Бухоро» жамоаси якунлаб турибди.
