Манчестер шаҳридаги Co-op Live Arena мажмуасида ташкил этилган профессионал бокс кечасида ўзбекистонлик чарм қўлқоп усталари рингга кўтарилди.
Супер оғир вазнда Баҳодир Жалолов хорватиялик Агрон Смакичига қарши баҳс олиб борди. 10 раундга мўлжалланган жангда ўзбекистонлик спортчи техник нокаут эвазига ғалаба қозонди. Рақиб 8-раунд олдидан жангни давом эттирмасликка қарор қилди. Шу тариқа, Жалолов профессионал боксдаги 18-ғалабасини қўлга киритди.
Шунингдек, ҳаваскор бокс бўйича амалдаги жаҳон чемпиони Жавоҳир Умматалиев ҳам проф боксдаги иккинчи жангини ўтказди. Ярим оғир вазн тоифасида у полшалик Дамиан Драбикни иккинчи раундда нокаут ҳолатига тушириб, муддатидан олдин ғалаба қозонди.
