Аргентина вице-президенти Англия футболчиларини "қароқчиларнинг авлодлари" деб атади
Аргентина вице-президенти Виктория Вильярруэль 2026 йилги футбол бўйича Жаҳон чемпионати ярим финалида бўлиб ўтадиган Англия – Аргентина учрашуви арафасида кескин баёнот билан чиқди. У ижтимоий тармоқдаги саҳифасида инглизларни «қароқчиларнинг авлодлари» деб атаб, бўлажак баҳс футболдан кўра кенгроқ маъно касб этишини таъкидлади.
«Биз қароқчиларнинг авлодларига қарши майдонга тушамиз. Бу шунчаки навбатдаги ўйин эмас. Мен сиёсий жиҳатдан тўғри гапиришга ёки ўзимни тийиб туришга уринмайман. Инглизларга қарши баҳс ҳар доим футболдан ҳам каттароқ маъно касб этади. Бу — Мальвина ороллари, бу — Диего Марадона, бу — Лео Мессининг сўнгги Жаҳон чемпионати ва бу — босқинчиларни тўхтатиш имконияти. Олға, Аргентина! Биз сўнгги нафасимизгача ўз ҳаққимизни талаб қиламиз», деб ёзди Вильярруэль.
Маълумот ўрнида, Мальвина ороллари (Британияда Фолкленд ороллари деб юритилади) юзасидан 1982 йилда Аргентина ва Буюк Британия ўртасида қуролли можаро юз берган. Уруш оқибатида 649 нафар аргентиналик ва 255 нафар британиялик ҳарбий ҳалок бўлган.
Тарихий рақобат ва мухлислар ўртасида эҳтимолий тўқнашувлар хавфи сабаб АҚШ Федерал қидирув бюроси (FBI), FIFA ҳамда маҳаллий ҳуқуқни муҳофаза қилувчи органлар иштирокида қўшма йиғилиш ўтказилиб, мазкур учрашув "энг юқори хавф" тоифасига киритилди.
Вице-президентнинг кескин баёнотидан фарқли ўлароқ, Аргентина терма жамоаси бош мураббийи Лионель Скалони спортни сиёсат билан аралаштирмаслик кераклигини таъкидлади.
"Бу шунчаки футбол ўйини. Кўп йиллар аввал содир бўлган воқеаларни бугунги спорт билан аралаштирмаслигимиз керак. Бу тарихимиздаги жуда ачинарли давр бўлган ва биз уни ҳурмат қилишимиз лозим", деган Скалони матбуот анжуманида.
Англия ва Аргентина ўртасидаги ярим финал учрашуви бугун, 15 июль куни АҚШда бўлиб ўтади. Ушбу баҳс ғолиби финалда Францияни 2:0 ҳисобида мағлуб этган Испания терма жамоасига қарши майдонга тушади.
