Украина Президенти Владимир Зеленский мамлакат ҳукуматида кенг кўламли кадрлар ўзгаришини бошлади. Давлат раҳбари “Нафтогаз” миллий компанияси раҳбари Сергий Корецкийни Бош вазир лавозимига тавсия қилди. Шу билан бирга, у Мудофаа вазири Михайло Федоровни ҳам алмаштириш ниятида. Бу ҳақда Reuters агентлиги хабар берди.
Нашр маълумотига кўра, Зеленский 15 июль куни Сергий Корецкий номзодини ҳукумат раҳбарлигига илгари сурган. Президентнинг таъкидлашича, Украина олдидаги энг муҳим вазифалардан бири мамлакатни қиш мавсумига тайёрлаш ҳисобланади.
"Устувор вазифалар аниқ – қишга тайёргарлик. Барча маслаҳатлашувлардан сўнг Сергий Корецкий Бош вазир лавозими учун энг муносиб номзод эканига ишонч ҳосил қилдим", деган Зеленский.
Украина қонунчилигига мувофиқ, Бош вазир номзоди Олий Рада томонидан тасдиқланади. Президентнинг "Халқ хизматкори" партияси парламентда кўпчилик ўринга эга бўлгани боис, Корецкий номзоди маъқулланиши кутилмоқда.
Шу билан бирга, Зеленский Мудофаа вазири Михайло Федоровни ҳам лавозимидан озод этишни режалаштирмоқда. Парламент депутатларининг маълум қилишича, унинг ўрнига 2023 йилдан буён Ички ишлар вазири бўлиб ишлаётган Игор Клименко тайинланиши мумкин.
Бу қарор Украина сиёсий доираларида турлича муносабат уйғотди. Айрим депутатлар ва ҳарбий таҳлилчилар Федоровнинг алмаштирилиши мамлакатнинг мудофаа салоҳиятига салбий таъсир кўрсатиши мумкинлигини билдирмоқда.
Парламентнинг Ташқи ишлар қўмитаси раиси Александр Мережко Федоров халқаро ҳамкорлар орасида юқори обрўга эга бўлганини ва унинг номи Мудофаа вазирлигидаги ислоҳотлар билан боғланганини таъкидлади.
Кўнгиллилар ҳаракати фаоли Мария Берлинская ҳам мазкур қарорни танқид қилиб, уни Украина учун жиддий оқибатларга олиб келиши мумкин бўлган қадам деб баҳолади.
Федоров эса ўзининг Telegram саҳифасида Украинага хизмат қилиш у учун катта шараф бўлганини билдириб, фаолияти давомида дронлар дастурини кенгайтириш, мудофаа харидлари тизимини такомиллаштириш ва вазирликда ислоҳотлар бошланганини қайд этди.
