Россия президенти Владимир Путин Қозоғистон президенти Қосим-Жомарт Тўқаевнинг Украинадаги урушни “музлатиш” ҳақидаги таклифига муносабат билдирди.
Кремль матбуот котиби Дмитрий Песковнинг маълум қилишича, Путин Тўқаевга “махсус ҳарбий операция” бўйича Россия позициясини батафсил тушунтирган.
Песковнинг сўзларига кўра, Москва ҳарбий ҳаракатларни тўхтатиш учун асосий шарт сифатида ўз олдига қўйган мақсадларига эришишни кўрмоқда.
“Биз учун энг асосий шарт бор — биз ўз мақсадларимизга эришишимиз керак”, — деган Песков.
Кремль вакили, шунингдек, Украина томонининг ҳозирги позициясини ҳисобга олганда, урушни “музлатиш” имкони йўқлигини таъкидлаган.
Песков Россия Ташқи ишлар вазирлиги икки йил аввал ҳарбий ҳаракатларни тўхтатиш шартларини билдирганини қўшимча қилган. Унинг айтишича, агар Украина расмийлари тегишли қарорларни қабул қилса, уруш “бугун кун охиригача тўхташи мумкин”.
Аввалроқ Қосим-Жомарт Тўқаев Омск шаҳрида Владимир Путин билан учрашувда Украинадаги можарони “музлатиш”, Стамбул келишувлари асосида музокараларга қайтиш ва тинчлик йўлида ҳаракат қилиш таклифини билдирган эди.
