Ўзбекистон миллий терма жамоаси ҳужумчиси Элдор Шомуродовнинг 2026 йилги футбол бўйича Жаҳон чемпионатида Конго Демократик Республикаси дарвозасига киритган голи турнирнинг энг чиройли голлари рейтингида иккинчи ўринни эгаллади. Бу ҳақда Халқаро футбол федерацияси (FIFA) маълум қилди.
FIFA расмий сайтида ўтказилган мухлислар овоз бериш якунларига кўра, мусобақанинг энг чиройли голи муаллифи сифатида Кабо-Верде терма жамоаси ҳимоячиси Сидни Лопеш Кабрал эътироф этилди. У Аргентинага қарши Жаҳон чемпионати 1/16 финал баҳсида урган голи билан биринчи ўринни қўлга киритди.
Овоз бериш натижаларига кўра, Элдор Шомуродовнинг Конго Демократик Республикасига қарши киритган голи иккинчи, Гаити терма жамоаси футболчиси Вилсон Исидорнинг голи эса учинчи ўринга муносиб деб топилди.
Кабралнинг ғолибликка муносиб кўрилган голи Майами шаҳрида бўлиб ўтган Аргентинага қарши баҳснинг қўшимча бўлимида урилди. У рақиб ҳимоячисини маҳорат билан алдаб ўтиб, жарима майдони ташқарисидан дарвозанинг узоқ юқори бурчагини аниқ нишонга олган. Учрашув Аргентина терма жамоасининг 3:2 ҳисобидаги ғалабаси билан якунланган бўлса-да, айнан шу зарба турнирнинг энг чиройли голи сифатида тан олинди.
Мукофотни қабул қилар экан, 23 ёшли футболчи ўша вазиятни эслаб ўтди.
"Рақибимдан ўтиб кетганимдан кейин бўш ҳудудни кўрдим ва зарба беришга қарор қилдим. Иккала оёғим билан ҳам яхши зарба бера оламан. Тўп юқори бурчак томон кетаётганини кўриб, “Мен нима қилиб қўйдим?” деб ўйладим. Бу Жаҳон чемпионатида урилган гол эди ва унинг шундай чиққанини англаш жуда қийин бўлди", деди Кабрал.
Футболчининг айтишича, у ўйиндан олдин гол урса, трибунада ўтирган онаси Тереза ва севгилисининг олдига югуриб боришини айтган. Бироқ гол нишонланган пайтда онаси кучли ҳаяжон туфайли ҳушидан кетган.
"Ёнига етиб борганимда онам йиғлаётганини кўрдим. Аммо у менинг олдига келганимни ҳам сезмаган экан. Атрофдагилар уни ҳушига келтириш билан овора эди, чунки гол урганимда ҳаяжондан ҳушидан кетиб қолган экан", деди Кабрал.
Қайд этилишича, турнирнинг энг чиройли голи учун даъвогарлар рўйхатидан Янги Зеландия вакили Элайжа Жаст, Франция терма жамоаси ҳужумчиси Килиан Мбаппе, Аргентина сардори Лионель Месси, Босния ва Герцеговина футболчиси Керим Алайбегович, Япония вакили Дайзен Маэда, Норвегия ҳужумчиси Эрлинг Ҳоланд, Аргентина футболчиси Хулиан Альварес, Англия ярим ҳимоячиси Жуд Беллингем ҳамда Испания терма жамоаси вакили Ферран Торрес ҳам ўрин олган.
