Фарғона вилоятида уюшган жиноятчиликка алоқадорлиги айтилган “Мансур Казанский” лақаби билан танилган шахс товламачиликда гумонланиб ушланди. Бу ҳақда вилоят ИИБ ахборот хизмати хабар берди.
Тергов маълумотларига кўра, Арипов Мансур Фозилович Тошкентда яшовчи фуқаронинг нотурар жойини 1,2 миллион долларга сотиб олишга келишган. Объект унинг номига расмийлаштирилганидан кейин банк кредити шартлари билан танишиб, қарз олишдан бош тортган.
Шундан сўнг у нотурар жойни эгасига қайтариш эвазига 200 минг доллар талаб қилгани айтилмоқда. Шунингдек, Арипов шериги билан бирга жабрланувчининг тадбиркор ҳамкорига босим ўтказиб, уни жиноий жавобгарликка тортиш билан қўрқитган ва пул талаб қилган.
Тезкор тадбир давомида гумонланувчи Фарғона шаҳридаги нотариал идорада бинога бўлган ҳуқуқни қайта расмийлаштириш эвазига 100 минг доллар олаётган вақтда ашёвий далиллар билан ушланган.
Ҳолат юзасидан Жиноят кодексининг 165-моддаси (товламачилик) билан жиноят иши қўзғатилган. Жиноятга алоқадор шахслар процессуал тартибда ушланган.
Ҳуқуқ-тартибот органлари мазкур шахсларнинг ноқонуний хатти-ҳаракатларидан жабр кўрган фуқароларни 102 рақами орқали хабар беришга чақирди.
