Лондоннинг "Арсенал" клуби ёзги трансфер ойнаси якунлангунига қадар яна уч нафар футболчини ўз сафига қўшиб олишни режалаштирмоқда. Бу ҳақда TEAMtalk хабар берди.
Нашр маълумотига кўра, "канонирлар" марказий ҳимоячи, чап қанот ҳимоячиси ва, агар трансфер бюджети имкон берса, ҳужумчи харид қилиш ниятида.
Айни вақтда "Арсенал"ни тарк этиши мумкин бўлган футболчилардан бири Рейсс Нелсон ҳисобланади. Унга Лондоннинг яна бир клуби "Вест Хэм" қизиқиш билдирмоқда.
"Арсенал" Нелсонни яна бир бор ижарага беришдан кўра, уни тўлиқ трансфер асосида сотишни афзал кўрмоқда.
Шунингдек, бразилиялик ҳужумчилар Габриэл Жезус ва Габриэл Мартинеллининг ҳам клубдан кетиши эҳтимоли бор.
Италиянинг "Наполи" клуби Жезусни ўз сафига қўшиб олишга қизиқмоқда. Туркиянинг "Галатасарой" клуби эса Мартинелли бўйича "Арсенал"га мурожаат қилган.
Шу тариқа, "Арсенал" трансфер ойнаси якунланишига қадар таркибини яна кучайтириш, шу билан бирга бир қатор футболчилар билан хайрлашишни режалаштирмоқда.
