Футболчи унда отасининг ўлими оғир йўқотиш бўлганини таъкидлаб, у билан бирга футболчилик фаолиятини якунлашни истаганини ёзган.
Хорхе Месси 7 август куни Аргентинанинг Росарио шаҳрида 68 ёшида вафот этган. У узоқ йиллар давомида ўғлининг вакили ва маслаҳатчиси бўлиб, Лионель Мессининг футболчилик фаолиятида муҳим ўрин тутган.
Месси мактубида 2026 йилги Жаҳон чемпионатида иштирок этиш масаласида отаси ундан кўп бор илтимос қилганини эслаган. Турнир бошланишига бир неча кун қолганида Хорхенинг аҳволи оғирлашган. Месси эса Аргентина терма жамоаси финалга чиқса, отаси унинг ўйинини кўриш учун сафар қила олишига умид қилган.
“Ҳар бир ўйиндан кейин сиздан хабар кутиб, сизни соғиндим. Ўша пайтда вазият жуда оғир эканини англадим. Шунга қарамай, имкони борича узоқроқ боришни ва сизга ҳеч бўлмаса битта ўйинимни кўриш имконини беришни ўйладим”, деб ёзди Месси.
Аргентина финалгача етиб борган, бироқ Хорхе Месси унинг ўйинини кўриш учун бора олмаган. Лионель Месси финалда ғалаба қозониб, Жаҳон чемпионлиги кубогини отасига олиб боришни хоҳлаганини, аммо жисмоний ҳолати бунга имкон бермаганини айтган.
“Биз финалга чиқдик, аммо сиз у ерда бўла олмадингиз. Мен сизга кубокни олиб келиш учун финалда ғалаба қозонишни хоҳладим. Аммо қила олмадим. Оёқларим энди менга бўйсунмасди”, дея ёзди футболчи.
Месси отаси билан Жаҳон чемпионати ҳақида тўлиқ суҳбатлаша олмай қолганидан афсусда эканини ҳам билдирган.
“Биз чемпион бўлмадик, аммо ҳар бир ўйиндан қанчалик завқланганимизни тасаввур ҳам қила олмайсиз. Ҳар доимгидек, сиз ҳақ эдингиз — мен у ерда бўлиб, ўйнашим керак эди”, деди Месси.
Футболчи мактубининг энг таъсирли қисмида эса отасисиз ҳаёти ва футболчилик фаолиятини қандай давом эттиришни билмаётганини тан олган.
“Сизсиз нима қилишни, ҳаётимни қандай давом эттиришни билмайман. Мен шунчаки футбол ўйнардим ва энди буни узоқроқ давом эттиришимга жиддий шубҳа қиламан. Сиз бошиданоқ ёнимда эдингиз ва охиригача ҳам оз қолганди. Нега бирга якунлашимиз учун яна бироз сабр қила олмадингиз?” деб ёзди 39 ёшли футболчи.
Шу билан бирга, Месси отасининг унга берган тарбияси ва қадриятларини энди ўз фарзандларига сингдириш орқали унинг хотирасини давом эттиришини билдирган.
Хорхе Месси Лионелнинг болалигиданоқ унинг футболчилик йўлида ёнида бўлган. У ўғлининг карьерасини бошқарган ва профессионал футболдаги фаолияти давомида унга вакиллик қилган.
