"Барселона" ва Испания терма жамоаси ҳимоячиси Пау Кубарси "Golden Boy 2026" соврини учун янгиланган номзодлар рейтингида биринчи ўринни эгаллади. Бу ҳақда журналист Фабрицио Романо хабар берди.
"Golden Boy" соврини Европа чемпионатларининг юқори дивизионларидан бирида иштирок этаётган 21 ёшгача бўлган энг яхши футболчига берилади.
Янгиланган рейтингда Пау Кубарсидан кейин "Барселона"нинг яна бир ёш юлдузи Ламин Ямаль иккинчи ўринда қайд этилган.
Топ-10 қуйидагича:
- Пау Кубарси — "Барселона";
- Ламин Ямаль — "Барселона";
- Ян Диоманде — "Реал Мадрид";
- Уоррен Заир-Эмери — "Пари Сен-Жермен";
- Аюб Буадди — "Лилль";
- Виктор Фрёхольдт — "Порту";
- Раян — "Борнмут";
- Эндрик — "Реал Мадрид";
- Эли Крупи — "Борнмут";
- Эстевао Виллиан — "Челси".
Қайд этилишича, футболчи "Golden Boy" совринини фаолияти давомида фақат бир марта қўлга киритиши мумкин. Шу сабабли Ламин Ямаль мазкур мукофотни иккинчи марта юта олмайди. Испаниялик футболчи 2024 йилда "Golden Boy" соҳиби бўлган.
"Golden Boy" совринига 2003 йилда Италиянинг "Tuttosport" газетаси томонидан асос солинган. Мукофот Европа олий дивизионларида ўйнаётган энг яхши ёш футболчига берилади.
"Golden Boy" "Олтин тўп" тақдирлаш маросимида бериладиган "Копа" совринидан фарқ қилади. "Golden Boy" календарь йили натижалари асосида топширилса, "Копа" соврини мавсум якуни бўйича берилади.
"Копа" учун овоз беришда фақат "Олтин тўп" совринининг аввалги соҳиблари иштирок этади. "Golden Boy" учун эса Франция, Испания, Англия, Португалия ва бошқа давлатлар вакиллари овоз беради.
