Тошкент ҳайвонот боғида шер ва жайраларга тош отган эркак 2 млн 884 минг сўм жаримага тортилди. Бу ҳақда ҳайвонот боғи матбуот хизмати хабар берди.
Қайд этилишича, Ички ишлар органлари профилактика инспектори қарори билан қоидабузарга 2 млн 884 минг сўм миқдорида жарима тайинланган. Шунингдек, у қилмиши учун узр сўраган.
Ҳодиса 13 август куни содир бўлган. Ҳайвонот боғига ташриф буюрган эркак шер ва жайраларга тош ота бошлаган. Жайралар вольери очиқ бўлгани сабабли ташланган тошлар ҳайвонларга теккан.
Ҳайвонот боғи маъмурияти маълум қилишича, эркакнинг хатти-ҳаракатини унинг фарзанди ҳам такрорлаган ва ҳайвонларга тош отган.
Энг ачинарлиси, ташриф буюрувчи ташлаган тошлар ҳайвонларга текканига ишонч ҳосил қилгач, қарсак чалиб, қилган ишидан мамнун бўлганини намойиш этган.
Воқеадан сўнг видеокузатув камералари орқали қоидабузарни аниқлаш ишлари олиб борилган. Натижада унинг шахси аниқланиб, қонунчиликда белгиланган тартибда чора кўрилган.
