Саида Мирзиёева Пекинда Хитой Коммунистик партияси тарихи музейида бўлди
Ўзбекистон Республикаси Президенти Администрацияси раҳбари Саида Мирзиёева Пекин шаҳрида Хитой Коммунистик партияси тарихи музейига ташриф буюрди. Саида Мирзиёева 2025 йил июнидан буён Президент Администрацияси раҳбари лавозимида фаолият юритиб келмоқда.
У музейда Хитойнинг бир асрлик тараққиёт йўлини акс эттирувчи экспозициялар билан танишди.
“Мазкур мажмуа ўзининг салобати, улуғворлиги ва мамлакатнинг бир асрлик тарихини асраб-авайлаб сақлаётгани билан кишида катта таассурот уйғотади”, — деб ёзди Саида Мирзиёева.
Музей залларида Хитойнинг мураккаб ва машаққатли тарихий йўли, шунингдек, бир аср давомида мамлакатда юз берган улкан ўзгаришлар ҳақида маълумотлар жамланган.
Хитой Коммунистик партияси тарихи музейи Пекинда 2021 йилда, партия ташкил топганининг 100 йиллиги арафасида очилган. Мажмуа партия тарихига бағишланган доимий ва комплекс экспозицияларни жамлаган.
Саида Мирзиёева музейга ташрифидан сўнг Хитой босиб ўтган тараққиёт йўлини экспозициялар орқали чуқур ҳис қилиш мумкинлигини таъкидлади.
