Чеченистонда 15 ёшли қиз рўмолини ўраётганда билмасдан игна ютиб юборган. Ушбу ёт жисм унинг организмида қарийб уч ҳафта давомида қолган. Бу ҳақда “Сапа Кавказ” хабар берди.
Қайд этилишича, воқеа ўсмир қиз рўмолининг учидаги безакни игна билан маҳкамлаётган вақтда содир бўлган. Қиз дарҳол шифокорларга мурожаат қилган. Икки кундан кейин ўтказилган текширувда игна ичакда экани аниқланган.
Шифокорлар игнани эндоскопик усулда олиб ташлашни режалаштирган. Бироқ ёт жисм жуда чуқур жойлашгани сабабли бу усулдан воз кечилган.
Орадан 20 кун ўтиб, игна табиий равишда организмдан чиқиб кетган.
“Бу жуда камдан-кам учрайдиган ҳолат ва катта омад”, — деган беморнинг қариндоши, шифокор-нефролог Тамила Сициева.
Сициева рўмол ўрайдиган қизларни игнани оғизга яқин тутмасликка чақирган. Унинг таъкидлашича, кўпчилик буни автоматик равишда амалга оширади, аммо эҳтиётсиз қилинган битта ҳаракат ўткир игнанинг ютиб юборилишига сабаб бўлиши мумкин.
Мутахассисга кўра, бундай ҳолат ички аъзоларнинг шикастланиши, жиддий асоратлар ва жарроҳлик амалиёти заруратига олиб келиши мумкин.
