Онтарио бош вазири Даг Форд АҚШ президенти Дональд Трампнинг Онтарио кўли номини "Америка кўли"га ўзгартириш ташаббусига жавоб қайтарди. Канада соҳилига "Онтарио кўли. Ҳозир ва ҳар доим" деган катта ёзув ўрнатилди.
Трамп аввалроқ кўл номини ўзгартириш ҳақида фармон имзолаган ва ижтимоий тармоқларда сунъий интеллект ёрдамида тайёрланган бир қатор видеоларни тарқатган. Уларнинг бирида Онтарио кўли белгиси олиб ташланиб, ўрнига «Америка кўли» деган ёзув ўрнатилади.
Форд эса кўл Трампдан анча олдин ҳам Онтарио деб аталганини ва у президентлик лавозимини тарк этганидан кейин ҳам шу номда қолишини айтди.
"Трамп ёки бошқалар унутмаслиги учун бу белгини ўрнатдик. Бу — ҳозир ва абадий Онтарио кўли", — деди Форд.
Онтарио кўли АҚШнинг Нью-Йорк штати ва Канаданинг Онтарио провинцияси билан чегарадош бўлган Буюк кўллардан биридир.
