Шимолий Кипр соҳилларида 267 киши бўлган паром ағдарилиб кетди. Ҳодиса оқибатида бир йўловчи ҳалок бўлгани хабар қилинди. Бу ҳақда BBC хабар берди.
Маълумотларга кўра, паромда 259 нафар йўловчи ва 8 нафар экипаж аъзоси бўлган. Қутқарув ишлари давомида йўловчиларнинг аксарияти қирғоққа олиб чиқилган.
Кипр турклари етакчиси Туфан Эрҳурманнинг маълум қилишича, 237 киши тирик қутқарилган, 7 киши ҳалок бўлган, 23 киши эса ҳануз қидирилмоқда.
Паром якшанба куни соат 12:30 да Кирения портидан Туркиянинг Тасужу портига йўл олган. Портдан чиққанига кўп ўтмай, кема номаълум сабабларга кўра сув ола бошлаган ва ағдарилган.
Ҳодиса Кирения соҳилидан тахминан 6,4 километр узоқликда содир бўлган. Қутқарув ишларига қирғоқ қўриқлаш хизмати ҳамда хусусий кемалар жалб этилган.
Қутқарилган йўловчилар Кирения портига олиб келиниб, шифохоналарга етказилган. Ҳозирча қидирув-қутқарув ишлари давом этмоқда.
