Таиландда 19 ёшли россиялик талаба Анна бедарак йўқолган. Қизнинг оиласи у одам савдоси қурбони бўлган бўлиши мумкинлигидан хавотирда. Бу ҳақда “Mash Breaking” хабар берди.
Маълум қилинишича, Анна Нижний Новгородда геодезия йўналишида иккинчи курсда таҳсил олган. У пулларини эҳтиёткорлик билан жамғариб борган, ҳатто акасига 350 минг рубль қарз берган.
Май ойи ўртасида қиз акасига қарзини қайтаришини сўраган. Шундан сўнг у барча жамғармаларини йиғиб, уйидан кетган.
Орадан бир неча кун ўтиб, Аннанинг онасига хабар келган. Унда қиз ўзининг аҳволи яхши экани, ҳеч ким уни ўғирламагани ва орзуси сари кетаётганини ёзган. Шунингдек, яқинларидан уни қидирмасликни сўраган.
Бироқ ота-онаси қизининг илтимосига қарамай, полицияга мурожаат қилган. Терговчилар аризани рад этгани айтилмоқда.
Оиласи кейинчалик Аннанинг 19 май куни Хитойга учгани, 21 май куни эса Таиландга йўл олганини аниқлаган.
Яқинлари қизнинг ўғирланган бўлиши мумкинлигини тахмин қилмоқда. Уларнинг таъкидлашича, Анна яхши ўқиган, ҳеч ким билан низолашмаган ва оила аъзолари билан яқин муносабатда бўлган.
Шунингдек, Мьянма билан чегара ҳудудида калтакланганлик излари бўлган, ҳолсизланган 19 ёшли россиялик қиз топилгани ҳақида хабар тарқалган. Бироқ унинг Анна эмаслиги маълум бўлган. Қизнинг акаси фотосуратдаги шахс унинг синглиси эмаслигини тасдиқлаган.
