АҚШ зарбхонаси мамлакат Президенти Дональд Трамп сурати туширилган 1 долларлик тангани муомалага чиқарди. Танга коллекционерларга ҳам сотилмоқда. Бу ҳақда “Al Jazeera” хабар берди.
Қайд этилишича, танга АҚШ Мустақиллик декларацияси қабул қилинганининг 250 йиллиги муносабати билан тайёрланган. Олтинранг танганинг бир томонида Дональд Трамп портрети, “LIBERTY” ҳамда “IN GOD WE TRUST” ёзувлари акс этган.
Танганинг орқа томонида эса АҚШ Президентлик муҳри ва қалқонда “250” рақами тасвирланган. Зарбхона танга мамлакатнинг юбилейи муносабати билан “руҳ, ғурур ва мерос”ни ифодалашини билдирган.
Бироқ Трамп сурати туширилган танганинг муомалага чиқарилиши АҚШда баҳсларга сабаб бўлди. Чунки мамлакатда амалдаги президентларнинг суратини валютада акс эттириш узоқ йиллар давомида анъанага зид ҳисобланган.
Бунга тарихдаги энг яқин мисол 1926 йилда кузатилган. АҚШ Мустақиллигининг 150 йиллиги муносабати билан чиқарилган эсдалик тангасида ўша пайтдаги Президент Калвин Кулиж ва мамлакатнинг биринчи Президенти Жорж Вашингтоннинг ёнма-ён портретлари жойлаштирилган.
Бироқ танқидчилар 1926 йилдаги танга оддий муомала воситаси эмас, балки юбилей муносабати билан чиқарилган эсдалик тангаси бўлганини таъкидламоқда.
Трамп сурати туширилган тангани чиқариш ғоясини АҚШ Молия вазири Скотт Бессент 15 июль куни ижтимоий тармоқда илгари сурган. Унинг айтишича, танга “Америка қадриятларининг кучини” ҳамда эркинликни асрашга қаратилган мамлакат ваъдасини ифодалайди.
Трамп маъмурияти президентнинг номи ва суратини турли объект ҳамда маҳсулотларда акс эттириш ташаббусларини ҳам илгари сурган. Улар орасида Кеннеди маркази, АҚШ Тинчлик институти, миллий боғларга кириш абонементлари ва мамлакатнинг 250 йиллигига бағишланган чекланган сериядаги паспортлар бор.
Шунингдек, Скотт Бессент май ойида Трамп сурати туширилган 250 долларлик янги банкнотини чиқариш бўйича тайёргарлик бошланганини маълум қилган. Бундай банкнотини муомалага чиқариш учун АҚШ Конгрессининг розилиги талаб этилади.
Танганинг номинал қиймати 1 доллар бўлса-да, АҚШ зарбхонаси уни коллекционерларга устама нархда сотмоқда. Жумладан, 25 танадан иборат ўрам 61 доллар, 100 таналик халта эса 154,50 доллардан таклиф қилинган.
АҚШ зарбхонаси тангалар нафақат безак ёки коллекция учун, балки расмий тўлов воситаси сифатида ҳам ишлатилиши мумкинлигини билдирган.
