Бугун, 7 сентябрдан бошлаб “Паркент – Тошкент – Паркент” йўналишида замонавий шаҳарлараро электропоезд қатнови йўлга қўйилди. Бу ҳақда “Ўзбекистон темир йўллари” АЖ хабар берди.
Маълум қилинишича, лойиҳа Ўзбекистон Президентининг 2025 йил 27 январдаги “Ўзбекистон Республикасининг транспорт-логистика тизимини янада ривожлантириш чора-тадбирлари тўғрисида”ги ПҚ-28-сон қарори асосида амалга оширилган.
Лойиҳа доирасида Тошкент вилоятидаги “Байтқўрғон – Паркент” темир йўл линияси қурилган. Қурилиш ишлари 2025 йил январь ойида бошланган.
Узунлиги 24 километр бўлган электрлаштирилган темир йўл линияси билан бирга 3 та темир-бетон кўприк, 1 та автомобиль йўл ўтказгичи, 76 та сув ўтказиш иншооти ҳамда 16 та автомобиль ва темир йўл кесишмаси барпо этилган. Шунингдек, 50 ўринга мўлжалланган “Паркент” темир йўл бекати қурилган.
Янги электропоезд 586 та ўриндиққа эга бўлиб, бир вақтнинг ўзида 1 154 нафаргача йўловчини ташиши мумкин.
Йўлкира нархи катталар учун 10 минг сўмгача, 10 ёшгача бўлган болалар учун эса 6,5 минг сўм этиб белгиланган.
Паркентдан Тошкентгача бўлган масофа электропоездда 50 дақиқада босиб ўтилади.
