Украина пойтахти Киевда қиш мавсумига тайёргарлик доирасида озиқ-овқат ва ичимлик суви захиралари шакллантирилмоқда. Шаҳар ҳукумати Россия қишда энергетика инфратузилмасига ҳужумларни кучайтириши мумкинлигидан хавотирда.
Киев шаҳар маъмурияти маълум қилишича, тайёрланган захиралар ҳисобига 25 минг нафар аҳолига иссиқ овқат етказиб бериш имкони бор. Маҳсулотлар, аввало, кам таъминланган аҳоли қатламларига мўлжалланган.
Шунингдек, озиқ-овқат захираларидан электр энергияси узилиши ҳолатларида ташкил этиладиган “Матонат пунктлари”да, фавқулодда вазиятлардан жабрланганларга ёрдам кўрсатишда ҳамда қутқарув хизмати ходимларини озиқ-овқат билан таъминлашда фойдаланиш режалаштирилган.
Расмийларга кўра, қўшимча равишда яна 20 мингта озиқ-овқат тўплами харид қилиниши кўзда тутилган.
Бундан ташқари, Киевда аҳолининг ижтимоий ҳимояга муҳтож қатламлари учун вақтинча жойлаштириш пунктлари ҳам тайёрланган. Ҳозирга қадар 1300 дан ортиқ ёлғиз кекса, ногирон фарзанди бор 400 га яқин оила ва ногиронлиги бўлган 500 нафар шахсни қишки турар жой билан таъминлаш бўйича мурожаатлар келиб тушган.
Украина ҳукумати Россия қиш мавсумида мамлакатнинг энергетика инфратузилмасига ҳужумларни кучайтириши мумкин, деб ҳисобламоқда. Киев расмийларига кўра, аввалги қишлардаги ҳужумлар оқибатида юз минглаб одамлар қаттиқ совуқ шароитида бир неча кун электр ва иссиқликсиз қолган.
Украина энергетика вазири Денис Шмигаль август ойида Россия қишда нафақат энергетика объектларига, балки сув таъминоти тизимларига ҳам зарба бериши мумкинлигини айтган.
“Ўтган қишда улар электр тармоқлари ва иситиш тизимларига зарар етказди. Электр бўлмаса ҳам, газ ва сув бўлса, омон қолиш мумкин. Аммо сув ва канализациясиз уч кундан ортиқ бардош бериш жуда қийин”, деган эди у.
Украина президенти Владимир Зеленский эса ёз давомида бир неча бор Киев Россияни урушни қишгача тугатишга мажбурлашга ҳаракат қилаётганини билдирган.
6 сентябрь куни АҚШ президентининг Москвада Владимир Путин билан учрашувдан сўнг Киевга келган элчилари билан учрашган Зеленский музокаралардан кейин уруш қишда ҳам давом этиши мумкинлигини айтди.
“Кўринишидан, уруш қишда ҳам давом этади”, деди Украина президенти.
