Канада АҚШ билан савдо музокаралари тўхтаб қолганидан сўнг Америка товарларига нисбатан жавоб тарифларини жорий қилди. Янги божлар 8 сентябрь куни ярим тунда кучга кирган. Бу ҳақда “Reuters” хабар берди.
Маълум қилинишича, жавоб тарифлари АҚШдан Канадага импорт қилинадиган умумий қиймати 20 миллиард доллар бўлган маҳсулотларга нисбатан қўлланади. Бож ставкалари маҳсулот турига қараб 15 фоиздан 50 фоизгача этиб белгиланган.
Тарифлар пўлат, мебель, кийим-кечак, электроника ва бошқа турдаги маҳсулотларни қамраб олган.
Канада ҳукумати мазкур чораларни АҚШ Президенти Дональд Трамп маъмурияти томонидан Канада маҳсулотларига жорий этилган тарифларга жавоб сифатида қабул қилган.
Қайд этилишича, АҚШ томонидан Канада маҳсулотларига киритилган тарифлар ҳажми ҳам қарийб 20 миллиард долларни ташкил этади. Улар Канада экспортининг тахминан 5 фоизини қамраб олган.
Шу тариқа, икки давлат ўртасидаги савдо муносабатларида тарифлар бўйича қарама-қаршилик янада кучайган.
