Туркиянинг Анталия ва Адана вилоятларида бир нечта ўрмон ёнғинлари қайд этилди. Анталиянинг Серик туманида айрим уйлар аҳолидан бўшатилган, бир нечта киши эса тутундан заҳарланиб шифохонага ётқизилган. Бу ҳақда “Anadolu” хабар берди.
Анталиянинг Серик туманидаги Денизтепеси ва Сариабали маҳаллаларида ўрмон ҳамда қишлоқ хўжалиги ерлари жойлашган ҳудудда ёнғин чиққан. Аланганинг аҳоли яшаш ҳудудларига яқинлашиши ортидан айрим уйлар хавфсизлик чораси сифатида эвакуация қилинган.
Ёнғин оқибатида 5 та уй ва айрим иссиқхоналар яроқсиз ҳолга келган. Ёнғин таъсирида қолган уйлардан бирида бўлган Иброҳим, Ҳадича ва Кираз Каража тутундан зарарланган. Улар тез ёрдам машиналарида шифохонага олиб кетилган.
Ёнғинни ўчириш ишлари давомида хусусий компанияга тегишли экскаватор жарликка ағдарилиб кетган. Ҳодисада жароҳатланган ҳайдовчи ҳам шифохонага етказилган.
Айни вақтда Серикдаги ёнғинга 12 та махсус ёнғин ўчириш машинаси, 4 та ўт ўчириш автомобили ва 6 та сув ташувчи цистерна ёрдамида қарши курашилмоқда. Ёнғинни тўлиқ назоратга олиш бўйича ишлар давом этмоқда.
Шунингдек, Адана вилоятининг Козан туманида икки нуқтада ўрмон ёнғинлари бошланган. Доғаналани маҳалласи қишлоқ ҳудудидаги ёнғиннинг келиб чиқиш сабаби ҳозирча аниқланмаган.
Кейинчалик Дюзағач маҳалласининг Дагилжак ҳудудидаги ўрмонзордан ҳам тутун кўтарилаётгани аниқланган. Ҳар икки ҳудудга махсус техника ва ёнғин ўчириш вертолётлари жалб қилинган.
Анталия ва Аданадаги ёнғинларни назоратга олиш ва тўлиқ бартараф этиш учун ҳаводан ҳамда ердан иш олиб борилмоқда.
