Россия дрони 8 сентябрь куни Украинадаги “Биз – Украина” телеканали биносига зарба берди. Ҳужум оқибатида дастлабки маълумотларга кўра, 5 киши жароҳатланган. Бу ҳақда “The Insider” хабар берди.
Маълум қилинишича, телеканал “Ягона янгиликлар” телемарафони доирасида эфирга чиқиб турган. Ҳужум содир бўлган вақтда журналистлар жонли эфирда бўлган.
Украина Президенти Владимир Зеленскийнинг билдиришича, зарба оқибатида телеканал биноси қисман вайрон бўлган. Ҳужумдан кейин бинода ёнғин чиққан ва уни Украина Фавқулодда вазиятлар давлат хизмати ходимлари ўчирган.
“Бугун Россия ОАВ ва журналистларга ҳужум қилди. Дрон “Ягона янгиликлар” телемарафонининг “Биз – Украина” телеканали биносига ҳужум қилди. Бу кундузи, журналистлар эфирда бўлган пайтда содир бўлди”, деган Зеленский.
Президент ҳозирча 5 нафар жабрлангани ҳақида маълумот борлигини, бироқ уларнинг сони яна ошиши мумкинлигини айтган.
Зеленский, шунингдек, Россия томонидан “Шаҳед” дронларининг оммавий ахборот воситаларига қарши қўлланишини танқид қилган.
“Украина ва украиналикларга қарши ҳеч бир ҳужум жазосиз қолмаслиги керак. Россияни тўхтатиш зарур ва бунга фақат биргаликдаги саъй-ҳаракатлар орқали эришиш мумкин”, деган у.
