Британияда ҳаво ҳаракатини бошқариш тизимида юзага келган техник носозлик мамлакатнинг йирик аэропортларида 1 300 га яқин рейснинг бекор қилиниши ва юзлаб парвозларнинг кечикишига сабаб бўлди. Бу ҳақда “Reuters” хабар берди.
Маълум қилинишича, носозлик 8 сентябрь куни Британия ҳаво ҳаракатини бошқариш хизмати — NATSнинг парвозлар ҳақидаги маълумотларни қайта ишлаш тизимида юзага келган. NATS маҳаллий вақт билан соат 18:34 да муаммо бартараф этилганини, тизим меъёрда ишлаётганини ва кечикиб қолган рейсларни тиклаш бўйича ишлар давом этаётганини маълум қилган.
Компания аввалроқ техник узилиш парвозлар хавфсизлигига таъсир кўрсатмаганини билдирган. Бироқ NATS бош директори Мартин Ролф “Sky News” телеканалига тизимдаги узилишга нима сабаб бўлгани ҳали аниқланмаганини айтган.
FlightRadar24 маълумотларига кўра, 8 сентябрь куни Британия аэропортларига қўниши ва улардан учиши режалаштирилган қарийб 1 300 та рейс бекор қилинган. 9 сентябрь куни учун ҳам 177 та рейс бекор қилинган бўлиб, уларнинг деярли барчаси мамлакатнинг энг йирик Хитроу аэропортига тўғри келган.
FlightAware маълумотларида эса 8 сентябрь куни Лондоннинг Хитроу, Гатвик, Лондон-Сити ва Лутон аэропортлари, шунингдек, Эдинбург ҳамда Бристол аэропортларида қарийб 490 та учиш кечиккани қайд этилган. Яна 525 та қўниш бекор қилинган ёки кечиктирилган.
“British Airways” авиакомпанияси Хитроу аэропортида энг кўп зарар кўрган ташувчилардан бири бўлган. Компания 333 та режалаштирилган рейсдан 16 тасини бекор қилганини маълум қилган.
“Ryanair” эса техник носозлик қарийб 150 минг нафар йўловчига таъсир кўрсатганини, кечикишлар саккиз соатгача етганини ва 200 дан ортиқ рейс бекор қилинганини билдирган. Авиакомпания NATS бош директори Мартин Ролфни истеъфога чиқишга ҳам чақирган.
“Wizz Air” ҳам Британия ҳаво ҳаракатини бошқариш тизимида шошилинч ислоҳотлар ўтказиш зарурлигини таъкидлаган. Компания такрорий техник носозликлар оқибатларини авиакомпаниялар, аэропортлар ва йўловчилар зиммасига юкламаслик кераклигини билдирган.
Авиация таҳлилчиси Жон Стрикленднинг айтишича, Европанинг серқатнов ҳаво ҳудудида парвозлар жуда қатъий жадвал асосида бошқарилади. Шу сабабли бир неча соатлик узилиш ҳам кўплаб аэропортларга таъсир кўрсатиб, авиакомпаниялар фаолиятида занжирли кечикишларни келтириб чиқариши мумкин.
Британия Фуқаролик авиацияси бошқармаси (CAA) NATSдан 8 сентябрь куни юз берган ҳодиса бўйича тўлиқ ҳисобот тақдим этишни кутаётганини маълум қилган. Шундан сўнг регулятор ҳаво ҳаракатини бошқариш тизими ишончлилигини таъминлаш учун қўшимча чоралар зарур ёки зарур эмаслигини баҳолайди.
Бу NATS тизимидаги биринчи жиддий узилиш эмас. 2023 йилда парвоз режаларини автоматик қайта ишлаш тизимидаги носозлик Британия аэропортларида кенг кўламли тартибсизликларни келтириб чиқарган. 2024 йилда эса CAA компаниядан бундай узилишларга тайёргарлик режаларини қайта кўриб чиқишни талаб қилган.
2025 йил июль ойида ҳам Британия ҳаво ҳаракатини бошқариш тизимида радар билан боғлиқ техник муаммо юзага келган. Бу Лондон ва мамлакатнинг бошқа ҳудудларидаги йирик аэропортларда парвозлар ҳаракати тўрт соатдан ортиқ вақтга издан чиқишига сабаб бўлган.
