Фарғона шаҳрида яшовчи, 1999 йилда туғилган, муқаддам судланган фуқаро икки нафар аёлни Россия пойтахти Москва шаҳрида фоҳишалик билан шуғулланиб, пул топишга қизиқтирган. Бу ҳақда Давлат хавфсизлик хизмати маълум қилди.
Маълум қилинишича, гумонланувчи аёлларга авиачипталарни ўз ҳисобидан олиб беришини айтган. Улар Москвага етиб боргач, ишлаб топган маблағларининг ярмини унга бериб туришини талаб қилган.
Давлат хавфсизлик хизмати ва ички ишлар органлари ходимлари ҳамкорлигида ўтказилган тезкор тадбир давомида ушбу шахс аёлларни Москвага жўнатаётган вақтда Фарғона халқаро аэропортида тўхтатилган.
Шу тариқа, унинг ноқонуний ҳаракатларига чек қўйилган.
Ҳозирда мазкур ҳолат юзасидан жиноят иши қўзғатилиб, тергов ҳаракатлари олиб борилмоқда.
