Франция футбол федерацияси (ФФФ) 2027 йилда бўлиб ўтадиган ФИФА президенти сайловида амалдаги президент Жанни Инфантино номзодини қўллаб-қувватлашдан воз кечади. Бу ҳақда “Agence France-Presse” манбага таяниб хабар берди.
Маълум қилинишича, федерация бу қарорини бугун, 10 сентябрь куни ижроия қўмитаси йиғилиши якунланганидан сўнг расман эълон қилади.
Франция федерациясининг бундай қарорга келишига Инфантинонинг ФИФАнинг асосий эркаклар ва аёллар мусобақаларини бошқарувчи алоҳида компания ташкил этиш ташаббуси сабаб бўлган. Июль ойида маълум қилинган мазкур лойиҳага кўра, “FIFA Forward Enterprise” компанияси ФИФА аъзо ассоциацияларининг даромадларини ошириш ва дунёда футбол ривожига ҳисса қўшиши керак эди.
ФИФА ушбу схема орқали 4,2 миллиард доллар маблағ жалб қилиниши мумкинлигини билдирган. Бироқ ташаббус амалдорлар, миллий федерациялар ва бошқа ташкилотлар томонидан танқид қилинган.
Жумладан, УЕФА, КОНКАКАФ, ОФК ва КОНМЕБОЛ Инфантинонинг мазкур таклифини рад этган. Кейинчалик Африка футбол конфедерацияси, Аргентина футбол ассоциацияси ва бошқа қатор миллий федерациялар Инфантинони қўллаб-қувватлашини маълум қилган.
56 ёшли Жанни Инфантино 2016 йил февраль ойида ФИФА президенти этиб сайланган. У кейинчалик икки марта рақобатсиз тарзда қайта сайланган.
ФИФА президентининг навбатдаги сайлови 2027 йил март ойида ўтказилади. Номзодларни тақдим этишнинг сўнгги муддати 2026 йил 18 ноябрь этиб белгиланган.
