9 сентябрь куни Словения пойтахти Люблянада Исроилнинг мамлакатдаги илк элчихонаси очилди. Бу қарорга қарши минглаб одамлар норозилик намойишига чиқди. Бу ҳақда “Al Jazeera” хабар берди.
Намойишчилар элчихона очилиши ўтказилган меҳмонхона ёнидан юриб ўтиб, “Биз тинчлик ва Фаластин учун биргамиз” ҳамда “Геноцид ўзини ҳимоя қилиш эмас” каби ёзувлар туширилган баннерларни кўтарган.
“Delo” газетаси июнь ойида ўтказган сўров натижаларига кўра, словенияликларнинг 56 фоизи Исроил билан яқинроқ алоқалар ўрнатишга қарши, 14 фоизи эса бундай муносабатларни қўллаб-қувватлаган.
Сиёсий таҳлилчи Андраз Зорко ҳукуматнинг Исроилга нисбатан сиёсатидаги ўзгариш мамлакатдаги жамоатчилик кайфиятига мос келмаётганини айтган. Унинг таъкидлашича, аҳолининг аксарияти Исроилга нисбатан салбий ёки бетараф позицияда.
Шунингдек, собиқ бош вазир Роберт Голоб бошчилигидаги “Озодлик ҳаракати” партияси “Сўл” партияси билан биргаликда Бош вазир Янез Янсага импичмент эълон қилиш таклифини парламентга киритган. Улар Янсанинг ташқи сиёсати Исроил манфаатларига хизмат қилаётганини билдирган.
Партия Ташқи ишлар вазири Тоне Кайзерни ҳам лавозимидан четлатишни талаб қилган.
Аввалроқ Голоб ҳукумати даврида Словения Фаластин давлатини тан олган, Исроилга қурол-яроғ экспортига эмбарго жорий қилган, босиб олинган Ғарбий Соҳилдаги ноқонуний Исроил аҳоли пунктларидан импортни тақиқлаган эди.
Элчихона очилиш маросимида Словения Ташқи ишлар вазири Тоне Кайзер бу воқеа “янада катта мулоқот, кучлироқ ҳамкорлик ва халқлар манфаатлари йўлида аниқроқ натижалар” даврининг бошланиши бўлиши кераклигини айтди.
Маросимда иштирок этган Исроил Ташқи ишлар вазири Гидеон Саар эса бу кунни “тарихий кун” деб атади.
