Арктиканинг Свалбард архипелаги яқинида Россия сувости кемаларининг махфий операцияси аниқланди. Москва сувости кабелларини яширинча ишдан чиқаришга мўлжалланган янги қуролни синаб кўришга уринган. Бу ҳақда “Reuters” хабар берди.
Ғарблик икки амалдорнинг маълум қилишича, операция Россиянинг “ГУГИ” деб аталувчи сувости ҳарбий бошқармаси томонидан ўтказилган.
Буюк Британия, Норвегия ва АҚШнинг қўшма операцияси давомида Россия кемалари кузатилган ва уларнинг ҳаракати тўхтатилган. Натижада Россия кемалари машғулотларни якунламасдан ҳудудни тарк этган.
Иттифоқчилар апрель ойида Россия томонининг ушбу ҳаракатини фош қилганини маълум қилган эди. Бироқ ўша вақтда янги қурол, операция ўтказилган ҳудуд ва унда АҚШ иштирок этгани ҳақида маълумот берилмаган.
Ғарб разведкаси вакиллари Россиянинг Европада қўпорувчилик ҳаракатларини кучайтириб, НАТО билан эҳтимолий можарога тайёргарлик кўраётганидан хавотир билдирмоқда. Вашингтон ва Лондон вакилларига кўра, денгиз ости кабелларини ишдан чиқариш ушбу режанинг муҳим қисми бўлиши мумкин.
Денгиз тубидан ўтказилган кабеллар глобал интернет ва молиявий операцияларнинг узлуксиз ишлашида муҳим аҳамиятга эга. Свалбард архипелагидан Норвегия материгига ўтказилган кабеллар сунъий йўлдош маълумотларини узатишда ҳам қўлланади.
Россия Мудофаа вазирлиги бу воқеа юзасидан изоҳ бермаган. Кремль эса НАТО мамлакатларида қўпорувчилик ҳаракатларини амалга ошираётганини доим рад этиб келади.
Операциядан сўнг Буюк Британия ва Норвегия расмийлари Москвага Россиянинг ушбу технологиясидан хабардор эканини билдирган. Бу орқали Россияни келгусида мазкур қуролдан фойдаланишдан қайтариш мақсад қилинган.
Маълум қилинишича, воқеа давомида Россия кабелларга зарар етказмаган. Машғулотлар фақат НАТО билан можаро юзага келган тақдирда қуролдан қандай фойдаланиш мумкинлигини симуляция қилиш билан чекланган.
“Биз биргаликда ўтказган операция орқали Россияга аниқ ишора юбордик. Улар яширинча ҳаракат қила олмайди”, деган Норвегия мудофаа вазири Торе Сандвик.
У муҳим инфратузилмага нисбатан ҳар қандай тажовузга қатъий жавоб берилишини таъкидлаган.
Апрель ойида Буюк Британия ва Норвегия “ГУГИ” бошқармасининг ҳаракатларини очиқлаган эди. АҚШ ва Буюк Британия ушбу махфий идорага қарши санкциялар жорий қилган.
