Туркиялик машҳур театр актёри Ўкан Каражан Истанбул шаҳрининг Шишли туманида ўтказилган тадбир вақтида стол устида турган ноутбукни ўғирлаганликда гумон қилинмоқда. Бу ҳақда “Haberler” хабар берди.
Қайд этилишича, воқеа жорий йилнинг 27 февраль куни Шишли туманидаги Шишли Марказ маҳалласи Дарюлажезе кўчасида содир бўлган. Э.Ш.А. исмли фуқаро 2 март куни полицияга мурожаат қилиб, тадбир вақтида ноутбуки ўғирланганини маълум қилган. У ҳуқуқ-тартибот органларига воқеа акс этган хавфсизлик камераси тасвирларини ҳам тақдим этган ва компьютерни Ўкан Каражан олганини айтган.
Полиция камера тасвирларини ўрганиб, ноутбукни олиб кетган шахс Ўкан Каражан эканини аниқлаган.
Каражан полицияга берган кўрсатмасида ноутбукни ўғирлаш нияти бўлмаганини, уни адашиб олиб кетганини билдирган. Актёрнинг айтишича, воқеадан бир неча кун ўтиб, 1 март куни Э.Ш.А. яна уч киши билан унинг олдига келган. Каражан уларнинг унга ҳужум қилиб, дўппослаганини иддао қилган.
Унинг сўзларига кўра, мазкур шахслар уни мажбуран олиб кетиб, автомобилнинг юкхонасига жойлаштирган. Шундан сўнг машинада унинг бошига қурол дастаси билан беш марта урган. Каражан ушбу ҳолатни ўзига нисбатан зўравонлик ва мажбурлаш деб баҳолаган ҳамда бу воқеа ноутбук билан боғлиқ можародан кейин содир бўлганини айтган.
Бироқ актёрнинг онаси И.К. ўғлининг бу даъволарини рад этган. Унинг айтишича, Ўкан воқеа куни ифтор дастуридан сўнг уйга ноутбук билан келган ва компьютер унга совға қилинганини айтган. Бир неча кундан кейин эса ноутбукни олиш учун келган шахсга онаси компьютерни топширган.
И.К.нинг таъкидлашича, Ўкан уйидан умуман чиқмаган, ҳеч ким уни мажбуран олиб кетмаган ва дўппосламаган. Шунингдек, у ўғлида руҳий муаммолар борлигини, дори-дармонларини бир муддатдан бери мунтазам қабул қилмай қўйгани сабабли хатти-ҳаракатлари беқарор бўлиб қолганини билдирган.
Ўкан Каражан “ошкора ўғрилик” жинояти бўйича қўлга олиниб, 7 март куни судга юборилган. Бироқ судга юборилганидан сўнг у озод қилинган.
Айни вақтда тарқалган хавфсизлик камераси тасвирларида Каражан телефон орқали гаплашаётгани, стол устидаги ноутбукни кўздан кечиргани, сўнг компьютерни қўлтиғига олиб, воқеа жойидан чиқиб кетгани акс этган.
