Конго Демократик Республикасининг исёнчилар назоратидаги Букаву шаҳрида содир бўлган ёнғин оқибатида камида 24 нафар мактаб ўқувчиси ҳалок бўлди, яна 29 киши жароҳатланди. Бу ҳақда Руанда томонидан қўллаб-қувватланадиган AFC/M23 ҳаракати томонидан тузилган маъмуриятдаги Жанубий Киву провинцияси вице-губернатори Дуния Масумбуко Бвенге маълум қилди.
Қайд этилишича, ёнғин Жанубий Киву провинциясидаги Букаву шаҳрида содир бўлган. Ёнғин оқибатида икки мактаб биноси ва 300 га яқин ёғоч уй вайрон бўлган. Ҳалок бўлганлар орасида 19 нафар қиз ва 5 нафар ўғил бола бор.
AFC/M23 ҳаракати баёнотида дастлабки маълумотларга кўра, ёнғинда 24 киши ҳалок бўлгани айтилган. Воқеанинг сабаблари ва ҳолатларини аниқлаш бўйича тергов бошланган. Ҳаракат маълумотига кўра, 29 киши тиббий ёрдам олмоқда, уларнинг 21 нафари реанимация бўлимида.
Дуния Масумбуко Бвенгенинг сўзларига кўра, ёнғинда 29 киши жароҳатланган. Ҳодиса сабабларини аниқлаш бўйича текширув давом этмоқда.
Гувоҳларнинг айтишича, ёнғин тушдан кейин ўчирилган. Бироқ вайроналар ва буришиб кетган тунука бўлаклари орасидан ҳали ҳам оқ тутун кўтарилиб турган.
“Биз хиёбонда эдик, болалар эндигина мактабга борган эди. Ёнғин мактабдан узоқ бўлмаган жойда бошланди”, деган воқеа гувоҳи Пьер Мудахама.
Унинг сўзларига кўра, тез ёрдам машиналари воқеа жойига етиб келиб, ҳалок бўлганлар ва жароҳатланганларни олиб кетган.
Аҳоли ва тиббиёт ходимлари қурбонлар сони яна ортиши мумкинлигини айтган. Воқеа жойида бўлган яна бир киши 17 нафар марҳумнинг жасадини, жумладан болалар ва катталарнинг таналарини тез ёрдам машинасига юклашга ёрдам берганини маълум қилган.
Маҳаллий тиббий марказга ёнғинда ҳалок бўлган 10 кишининг жасади олиб келинган. Бошқа бир шифохона эса 50 нафардан ортиқ ўқувчи қабул қилинганини, улардан 14 нафари вафот этганини билдирган.
Маълумот учун, AFC/M23 ҳаракати ўтган йил бошида Конго Демократик Республикасининг шарқий қисмида кенг кўламли ҳужум бошлаб, Букаву шаҳрини эгаллаган.
