Венесуэланинг собиқ президенти Николас Мадуронинг рафиқаси Силия Флорес суд жараёни бошлангунга қадар уни уй қамоғига ўтказишни сўраб, федерал судьяга мурожаат қилди. Бунга унинг юраги билан боғлиқ жиддий муаммолари сабаб бўлган.
Флореснинг адвокати Марк Доннеллининг судга киритган илтимосномасида қайд этилишича, унинг ҳимоясидаги шахсга юрак катетеризациясидан ўтиш тавсия этилган. Муолажа кейинчалик янада инвазив кардиологик амалиётларни талаб қилиши мумкин.
Адвокатнинг айтишича, Флорес турмуш ўртоғи билан бирга АҚШ ҳарбийлари томонидан қўлга олингунига қадар соғлом бўлган ва доимий равишда дори воситалари қабул қилмаган. У фақат митрал клапан пролапсини назорат қилиш учун ҳар ойда бир марта инъекция олган.
Ҳозирда унга бир нечта дори воситалари, жумладан, эҳтимолий юрак хуружи вақтида шошилинч қабул қилиш учун мўлжалланган препарат ҳам тайинланган. Бироқ Флорес ҳибсга олинганидан бери ҳар ойлик инъекциясини олмаган.
69 ёшли Силия Флорес ва 63 ёшли Николас Мадуро АҚШ ҳарбийлари уларни Каракасда қўлга олиб, Нью-Йоркка олиб келганидан бери Бруклиндаги қамоқхонада сақланмоқда.
Уларга кокаинни АҚШга олиб кириш мақсадида тил бириктириш, пулемёт ва портловчи қуролларни сақлаш билан боғлиқ айбловлар қўйилган. Мадурога, шунингдек, наркотерроризм билан боғлиқ тил бириктириш айблови ҳам қўйилган.
Судда эр-хотин айбловларни тан олмаган. Суд жараёни июнь ойида бошланиши кутилмоқда. Айбдор деб топилган тақдирда, уларга умрбод озодликдан маҳрум қилиш жазоси тайинланиши мумкин.
