Туркиянинг “Тургутлуспор” клуби 22 ёшли Зейнеп Местанни эркаклар жамоасига бош мураббий этиб тайинлади. Шу тариқа у клуб тарихида эркаклар жамоасини бошқарган биринчи аёл мураббийга айланди.
Клуб матбуот хизмати хабар беришича, собиқ футболчи Зейнеп Местан клуб президенти Йилмаз Генчтюркнинг лойиҳасини ўрганиб чиқиши ва мураббийлар штаби билан ўтказилган маслаҳатлашувлардан сўнг лавозимга танланган.
Клуб президентининг таъкидлашича, Местан жамоага реклама мақсадида таклиф қилинмаган. Унинг футбол бўйича билими, тактик тайёргарлиги ҳамда жамоа ривожи бўйича тақдим этган лойиҳаси инобатга олинган.
“Ижтимоий тармоқларда кескин муносабат билдирилишини билардим. Аммо биз майдондаги ўйин ва мавсум якунида эришадиган натижаларимизга тўлиқ эътибор қаратамиз”, — деди Местан.
Янги бош мураббий “Тургутлуспор”ни беш йил ичида Туркиянинг иккинчи даражали чемпионати — Биринчи лигага олиб чиқишни мақсад қилган. Ҳозирда клуб Туркия футболининг ҳаваскорлар даражасидаги мусобақаларида иштирок этмоқда.
Зейнеп Местан 2004 йил 30 июль куни Измир шаҳрида туғилган. У футболчилик фаолиятини 2019 йилда бошлаган. Местан фаолияти давомида “Каршияка”, “Коньяк Беледиеспор” ва “Борнова Хитаб Спор” клубларида тўп тепган.
