Франция ва Словакия Ўзбекистонда туғилган россиялик миллиардер Алишер Усмоновни Европа Иттифоқининг санкциялар рўйхатидан чиқаришни таклиф қилди. Бу қарор ЕИнинг айрим аъзо давлатларида кескин норозиликка сабаб бўлган. Бу ҳақда Euronews хабар берди.
Словакия аввалдан Усмонов ва яна бир россиялик миллиардер Михаил Фридманни санкциялар рўйхатидан чиқаришни талаб қилиб келган. Энди бу ташаббусни Франция ҳам қўллаб-қувватлаган.
Дипломатларнинг айтишича, Парижнинг позицияси айрим давлатларда кучли норозилик уйғотган. Усмонов 2022 йилда Россиянинг Украинага кенг кўламли босқинидан сўнг ЕИ санкцияларига киритилган.
ЕИ санкцияларини узайтириш учун барча аъзо давлатларнинг бир овоздан розилиги талаб этилади. Шу сабабли Усмоновни рўйхатдан чиқариш масаласи санкцияларни узайтириш бўйича музокараларни мураккаблаштириши мумкин.
Европа Иттифоқи санкциялар масаласини 15 сентябрга қадар ҳал қилиши керак.
