Фарғона вилоятининг Бағдод туманида пул ва қимматбаҳо буюмларни ўғирлаш мақсадида бувисининг уйига шериги билан борган йигит уни пичоқлаб ўлдирди. Жиноятни яшириш мақсадида эса хонадонга ўт қўйди. Суд ҳукми билан у 17 йилга, шериги 16 йилга озодликдан маҳрум қилинди.
Маълум бўлишича, марҳума кўп қаватли уйда ёлғиз яшаган. У фоиз эвазига пул бергани ва хонадонда катта миқдорда маблағ борлигини набираси билган. Аввал ўғрилик учун икки марта судланган йигит бувисининг пулларини ўғирлашни режалаштирган.
У жиноятдан икки кун олдин Тошкентда ишлаётган тенгдошини Бағдодга чақирган. Шериги келгач, улар марҳуманинг уйини кузатган, аммо атрофда одамлар кўплиги сабабли режани амалга оширмаган.
Эртаси куни улар яна хонадонга борган. Бу сафар уйда ҳеч ким бўлмаган ва йигитлар ичкарига кириб, пул ҳамда қимматбаҳо буюмларни қидира бошлаган. Шу пайт марҳума уйига қайтиб келиб, уларга қаршилик кўрсатган.
Набираси ўзи билан олиб келган ошхона пичоғи билан бувисининг кўкрак қисмига зарба берган. Оғир жароҳат олган аёл ҳушидан кетган. Йигитлар эса хонадондан тилла занжир, зирак, автомобиль монитори ва 2 миллион сўм пулни олиб чиқиб кетган.
Шундан сўнг йигит жиноят изларини яширишга уринган. У 10 литр бензин сотиб олиб, уни уй яқинига яширган. Кечаси хонадонга қайтиб, бензинни уйнинг турли жойлари ва бувисининг жасадига сепиб, ўт қўйган. Кейин эшикни қулфлаб, воқеа жойидан кетган.
Жиноят ишлари бўйича Бувайда туман суди ҳукми билан йигит Жиноят кодексининг 97-моддаси 2-қисми “п” банди, 169-моддаси 2-қисми “г” банди ва 173-моддаси 2-қисми “б” бандида назарда тутилган жиноятларни содир этганликда айбли деб топилиб, 17 йилга озодликдан маҳрум қилинди.
Унинг шериги ҳам Жиноят кодексининг 97-моддаси 2-қисми “п” банди ва 169-моддаси 2-қисми “г” бандида назарда тутилган жиноятларни содир этганликда айбли деб топилди ва унга 16 йил озодликдан маҳрум қилиш жазоси тайинланди.
