Жиззахда келин қайнонаси ва қайнопалари томонидан бир неча ой давомида қийноққа солингани айтилмоқда. У хонага қамаб қўйилган, овқат ва сувдан маҳрум қилинган, калтакланган ҳамда устига туз ва сода қўшилган қайноқ сув қуйилган. Жабрланувчининг отаси қизи учун айбдорларга энг оғир жазо берилишини талаб қилмоқда. Бу ҳақда “Nemolchi.uz” хабар берди.
Маълум қилинишича, ёшлар 2025 йил октябрь ойида оила қурган. Уларнинг бир нафар қизи бўлган ва оила ижарадаги хонадонда яшаб келган.
2026 йил май ойида аёлнинг турмуш ўртоғи қамоққа олинган. 30 июнь куни унинг онаси ва опаси Зaрнигор Йўлдошева билан бирга қамоқхонага бориб, уни йўқлаб қайтган. Қайтишда Зaрнигор келинининг паспорти, телефони ва фарзандининг туғилганлик ҳақидаги гувоҳномасини олиб қўйган.
Бундан бир неча кун аввал эса қайнонаси ва қайнопаси келинни тилла буюмни насияга олишга мажбур қилган ва уни гаровга қўйган. Қайнонаси унинг номига “iPhone” ҳам олмоқчи бўлган, бироқ аёлнинг тўланмаган кредити борлиги сабабли бу рад этилган.
Қамоқхонада эрини йўқлаганида келин унга содир бўлаётган воқеалар ҳақида айтиб берган. Шундан кейин унга нисбатан қийноқлар бошлангани айтилмоқда.
6 июль куни қайнонаси ва қайнопаси квартира ижарага олиб, келинни хонага қамаб қўйган. У эрга кредит ва тилла буюм билан боғлиқ воқеаларни айтиб бергани учун жазолана бошлаган.
Айтилишича, аёлни мунтазам равишда калтаклашган, бўғишган, бошини деворга урган ҳамда қорни ва бачадонига тепишган. Қайнопаларидан бири уни доимий равишда қўриқлаб, хонадан чиқишига йўл қўймаган.
Зўравонлик ҳолатларининг айримлари видеога ҳам олинган. Шунингдек, келин ва унинг оила аъзолари ўлдириш билан қўрқитилгани айтилмоқда. Қайнона ва қайнопалари руҳий касалликлар шифохонасидан маълумотнома олганини, шу сабабли уларга ҳеч ким ҳеч нарса қила олмаслигини айтган.
Келин мажбуран ушлаб турилган даврда унга бир бўлак нон берилган ва кунига бир марта ҳожатхонага чиқишга рухсат этилган. У тараканларга қарши дори воситасини ейишга ва ҳожатхона сувини ичишга мажбур қилинган.
27 август куни “Руҳшона” исмли қайнопаси келинни калтаклаб, унинг кийимлари ва заргарлик буюмларини йиртиб, бузиб ташлаган. Сўнг уларни ахлатга ташлашга мажбур қилган. Камерага тушиб қолмаслик учун эса уни лифтдан эмас, зинапоядан тушишга мажбурлаган.
29 август куни Руҳшона келинни яна қўрқитиб, хонасига кирган ва осмонга қараб ётишни буюрган. Шундан сўнг ундан:
“Устингга қайноқ сув қуйсам, куйасанми?”
деб сўраган. Келин “ҳа” деб жавоб берган.
Бир неча дақиқадан сўнг у келиннинг устига қайноқ сув қуйган. Қўрқиб кетган аёл кийимларини ечмоқчи бўлганида, қайнопаси уни сочидан тортиб, “Нега акамга тегдинг? Нега унга бола туғиб бердинг?” дея бақирган.
Шундан кейин келинни ошхонага судраб киритиб, тозалашга мажбур қилган. Аёл идиш юваётганида, Руҳшона қайноқ сувга туз ва сода қўшиб, уни яна келиннинг устига қуйган.
Кейин эса бошлаган ишини кечқурун ҳам давом эттиришини айтган ва келинни сочидан ушлаб хонага судраб кириб, қамаб қўйган.
Ўша куни кечқурун қайнопаси Зaрнигор Йўлдошева келиндан беш ойлик қизини ташлаб, изсиз ғойиб бўлиб кетишини талаб қилган.
6 сентябрь куни қайнопаси балкон эшигини қулфлашни унутиб қолганидан фойдаланган жабрланувчи хонадондан қочиб чиққан. Учинчи қаватдан ёнғин зинапояси орқали тушиб, кўчадаги одамлардан такси чақириб беришни сўраган.
Шундан сўнг у отасига қўнғироқ қилган ва улар биргаликда касалхонага борган. У ерда ички ишлар ходимлари улардан кўрсатма ва тушунтириш хати олган.
Аёл оғир аҳволда касалхонага ётқизилган. Отасининг айтишича, у ҳозиргача суд-тиббий экспертизасидан ўтказилмаган. Терговчи экспертиза аёл касалхонадан чиққандан кейин ўтказилишини билдирган.
9 сентябрь куни “Nemolchi.uz” таҳририяти мазкур ҳолат ҳақида Ички ишлар вазирлиги Хотин-қизлар масалалари бўйича бошқармаси бошлиғи Нилуфар Ғиёсовага хабар берган.
Унинг айтишича, жабрланувчи билан суҳбатлашилган ва Ўзбекистон Республикаси Жиноят кодексининг 109 ва 110-моддалари бўйича жиноий иш қўзғатилган.
Бироқ мақола эълон қилинган вақтга қадар Ички ишлар вазирлигининг ҳеч бир ходими жабрланувчининг отаси билан боғланмагани айтилмоқда. Отаси ҳам 6 сентябрдан буён ҳуқуқни муҳофаза қилувчи органлар томонидан у билан боғланилмаганини билдирган.
Жабрланувчининг отаси қизи қийноққа солингани ва унга нисбатан зўравонлик содир этганлар учун энг оғир жазо тайинланишини талаб қилмоқда.
Таҳририят ҳолат юзасидан Бош прокуратурага мурожаат қилганини маълум қилган.
Жабрланувчи аёл танасида оғир куйишлар ва жароҳатлар билан касалхонага ётқизилган. Унинг соғлиғига етказилган зарарнинг узоқ муддатли оқибатлари, жумладан, келгусида фарзанд кўриш имкониятига таъсири ҳозирча номаълум.
Мазкур ҳолат бўйича тергов ҳаракатлари давом этмоқда.
